地產代理行見樓市終有起色，慰勞吓啲夥計。美聯決定，搞番全公司周年晚宴，周四喺會展擺二百圍，使一百八十萬。
美聯請咗食家唯靈幫手，寫當晚菜單，菜式好似「龍王太子」、「展翅高揚」同「紅運當頭」等，夠晒意頭。
為增加氣氛，送金勞外，最多人鍾意梗係錢啦，現金大獎係一萬蚊。據聞，當晚淨係現金都送逾三十萬。
另外，中原入主後第一年賺錢嘅利嘉閣，今晚舉行周年晚宴。為咗顯示實力，佢哋公布嘉賓名單，都係地產發展商售樓部高層，有成二十一間咁多。
中原單係住宅部，上月營業額逾億三，係九八年十月（億四）以嚟新高。
全公司二百三十組，有五十三組營業額過百萬，最搵錢一組，係灣仔鷹君中心分行，原因係赤柱富豪海灣帶挈。
中原集團早前宣布，後勤員工首季可獲逾半個月花紅。𠵱家會唔會加碼呢？
美聯屬下香港置業，上月生意較前一個月多逾一倍，係五年新高。董事胡日發話，會喺西九龍、將軍澳同港島東等加分行。
樓市好景，地膽代理行都好好搵。荃灣地膽晉誠，營業經理張秋話，公司一月生意逾百萬。一手大增，主要受同區朗逸峯二期帶動。
佢同事黃鴻威（圖四）就人如其名，夠晒威，做到超過四十五萬數，包括三間朗逸峯、深井碧堤半島及尖沙嘴擎天半島各一，重有其他二手，因而升任助理分行經理。晉誠計劃下個月加分行，主攻荃灣，年底再開。預期今年生意千五萬。
蘭西
電郵地址：
