禽流感事件似乎愈搞愈大，唔好話小初一家大細都有多少擔心，港股亦大幅波動，恒指噚日大跌近300點。
好多隻原本炒得好地地嘅股份，紛紛掉頭下跌，尤其係啱啱配完股復牌嘅股份，好似中聯系統（757）同華凌集團（382）皆跌到四腳朝天，但上海世紀（755）就例外，不但冇跌，重逆市上升。
經紀陳話，呢啲正係上海幫精妙之處，而且今次係批新股，股份尚未到手，點會有沽壓？上海世紀話集資大部份將用作地產相關業務的投資，但就未有特定項目，呢一點就更加惹人遐想。
上海世紀今次向一名獨立第三者，按每股0.1333元，配售3億股新股，集資金額近4000萬元．雖然配售價較停牌前0.15元，有折讓11.13%，但隻股噚日復牌，最高見過0.164元，收0.158元，逆市升5.3%。
經紀陳重話，一日批新股未出籠，估計上海世紀股價都會有支持。
慕容小初