瘟疫恐怖大升級，禽流感初現人傳人，泰國同越南，日添新症，由廣州至蘭州，都發現雞隻禽流中招。
回想當初沙士初現，中國經貿高官、朱鎔基頭馬龍永圖氣燄囂張，不可一世，話香港傳媒「誇大渲染」，佢話：死幾個人就叫災難？起碼死夠三十萬人，先至係災難！
𠵱家果然應咗龍某嗰張烏鴉禽流嘴：醫生警告：禽流感一旦人傳人，全港會有三十萬人死亡，一百七十萬人受感染，龍永圖真係靈過車公，睇怕特區政府應該喺車公廟隔籬，起多座「龍王廟」，令香港人世代永記龍永圖呢番豪言。
災難當前，廢董政府照樣束手無策。本來，凡對於一隻未明嘅病毒，要調動全個社會，堅壁清野，洗太平地，勿謂敵之不來，要預敵之必來，不可心存僥倖，以為敵人殺傷力有限，一定要當正係最兇頑、最惡劣，先至可以保命致勝！
但廢董呢？佢講就識講「經一事，長一智」，事實就係經一災，都重係一pat屎！弱勢政府，毫無管治威信，經五千雞販拋一拋、嚇一嚇，佢又唔知點算！
人哋澳門就強行禁止大陸雞禽入口，董班子嘅措詞，只係「要求」唔好輸入大陸雞禽。衞生署重話同啲雞販打防疫針，之不過，世衞組織早已講到明：禽流感病毒，變種快，同人嘅流感一結合，基因洗牌，疫苗即時無效！
既然係咁，打疫苗又點夠？應該全港禁售任何活雞，唔理你係大陸啄地，定係本地飼養嘅走地雞。寧緊勿寬，寧枉毋縱，即使係冰鮮雞，都要暫停供應！
吓，咁咪即是全港市民冇雞食？冇錯嘞，就係冇雞食！咁啲雞販禽商「業界」嘅「生計」又點？點？六百萬人嘅生命安危，梗係首要！即是台灣人二千一百萬個個主張台獨，中方都話，十三億人嘅民意大晒。冇雞食，可以轉食牛羊肉，或者從此皈依我佛，食素積福。
至於嗰五千雞販，董班子咪口口聲聲話要「經濟轉型」？一世劏雞，老竇劏完，雞檔傳畀個仔，咁香港幾時先會實現廢董噏過嘅「高科技港」？任志剛話，佢領導嘅金管局同香港投資外滙，去年狂賺咗九百億？啱嘞。雞禽販想要幾多錢賠償，佢哋先至肯放下屠刀，更好地協助香港實現高科技港嘅知識經濟轉型？五千萬唔夠，五億夠未？五億唔夠，五十億夠未？一定有辦法搞得掂。
而廢董就一直縮窒縮窒，食環署重話，喺度密切「觀望」緊。噚日政府重突然宣布周五有番活雞賣，咁即係喺全港九新界放置新炸彈。大陸成為禽流感災區，一見人傳人，連自由行都要叫停，不過，對於廢董，咁即是唔「愛國」喎。
傳真︰2623-9278
電郵︰