禽流感愈嚟愈惡，搞到港股跌破13000關口，恒指收報12999，跌289點，成交179億元。阿虎屈指一算，港股4日已跌逾700點，調整幅度唔算細，但恒指似乎未跌完，可能要跌至12800才喘定，大市近日成交有減少迹象，觀望氣氛轉濃。
港府原本預計今年外滙基金投資收入會相當豐厚，財赤可望大減。點知噚日任總喺立法會披露，投資收入受禽流感拖累，在短短6日內，由156億元減至78億元，減幅高達50%，跌幅重勁過港股。香港03/04年度赤字睇嚟唔易估計。
市場充斥利淡情緒，中聯系統（757）經唔起大股東和黃（013）減持的考驗，股價全日大跌31%，收報1.05元，成交高達1.418億元。如果係早排旺市，市場話唔定會當好消息炒，話和黃完成減持，撇除不明朗因素，將中聯系統大幅炒高都唔奇。
先思行（595）落實將Reigncom股份出售，沽出2.3%股權，套現逾8000萬元，獲利7660萬元。先思行手上仍有12.4%Reigncom，可惜3個月內都唔可以再沽，若能賣埋餘下股份，可勁賺逾4億元，而先思行03年度純利只係1260萬元，但先思行噚日復牌，股價跌1.84%，收1.60元。港股大幅調整近300點，先思行可以話係跌少當升。
實惠（996）攻佔沙地市場，股價已經相當靚仔，如今又玩拆細，1拆5，刺激股價逆市升20.4%，收報5.45元。不過黑客話，市傳實惠可能趁高批股，高追有風險。
阿虎