財經事務委員會昨舉行了長達3個鐘的馬拉松式質詢，財政司司長及金融管理局總裁，罕有地攜手應戰，印象中雙雄出擊，要追溯至98年金融風暴後，前財爺煲呔曾與任總就入市打鱷解畫，今次主角依然係任總，財爺則換了當年尚是議員的唐英年。
俗語話人比人比死人，財爺指請本地優秀人才，同老外人工比唔恰當。李卓人即刻食住上，唔同格林斯潘比，「同你自己比呃……講人才，財爺你都係人才呃……」。一頂大高帽，搞到唐司長笑到見牙唔見眼，不過與任總相當合拍的財爺，全程為該局護航，難怪最後卿姐都要總結一句：即係乜都唔肯改！
民主派議員對任總八百萬年薪當然唔會放過，李卓人追問唐司長點解唔將薪酬顧問報告建議，引入金管局薪酬制度內，更質問財爺：「到底司長係咪表面採納（報告意見），然後轉過頭將佢放到地氈。」點知財爺都唔弱，回應話：「有乜嘢喺地氈底都俾議員用吸塵機吸晒出來。」之後發言議員，都繼續垃圾、吸塵機咁搞來搞去，連主席劉漢銓都忍唔住話「乜咁玄」。