對話被盜錄誓追究
馮仁昭四圍超：Marianne發信要Joyce交代

梅艷芳生前同現代美容嘅合約只履行咗三個月，近日有人發放美容中心老闆娘曾裕（Joyce）同阿梅生前經理人王敏慧（Marianne）嘅錄音光碟，揭發咗兩人嘅爭拗。亦有報道指傳媒收到錄音光碟同日，MuiMusic都收到美容中心發出追討二百萬賠償嘅文件。

「未收到信冇回應」
Marianne噚晚就向傳媒傳真咗一份發畀Joyce嘅律師信，內容主要係追究上個月十六號喺現代美容辦公室俾人盜錄對話，然後製成光碟發放傳媒嘅事件，佢覺得咁樣好似被侵犯私隱權，所以希望Joyce可以作出詳盡解釋。而Marianne同阿梅嘅生前助手Donny就保留法律追究嘅權利。
查小欣噚日喺電台度，亦都話MuiMusic喺上個月二十六號收到美容中心方面追討二百萬賠償嘅信件，噚日係七日限期，據知Marianne會到律師行草擬回覆，佢認為美容中心係冇理據收取呢個數目，故要求對方解釋。
至於Joyce噚日就透過同事表示：「我哋重未收到對方嘅律師信，唔知乜嘢內容，所以暫時冇嘢可以回應。」採訪：駱華齡

嚴淑明堅持愛聽「叫床」
嚴淑明噚日喺台灣推出新唱片，佢之前同台灣記者講最鍾意聽「叫床」（趙傳）嘅聲音，即時成為台灣嘅話題，啲記者教佢讀趙傳嘅國語發音，但係佢點讀都重係讀成「叫床」。嚴淑明最近又幫當地即將出版嘅《GQ》雜誌影咗唔少性感相，睇嚟嚴淑明誓要喺台灣打出名堂。

藍潔瑛靜靜雞出院
藍潔瑛農曆新年期間無端報稱自殺，之後入住東區尤德醫院精神科，直至噚日下午，一名醫院工作的女士向記者透露，藍潔瑛已經喺朝早由後門離開咗醫院。記者去到藍潔瑛西貢間屋，發現屋內烏燈黑火，冇人應門，但到傍晚時分有人着燈，可能藍潔瑛暫時唔想暴露行蹤。

陳錦鴻婚禮玩另類
啱啱榮升為酒樓老闆嘅陳錦鴻又有喜事宣布，今個月尾佢將會同拍拖五年嘅女友杜雯惠拉埋天窗。但係由於錦鴻嘅童年陰影，覺得喺手嘅嘢會隨時冇咗，所以佢嘅婚禮相當特別，唔着禮服，唔擺喜酒，就連結婚戒指都只係得一隻，一切都要等到結定婚先做喎。連馮仁昭都未見過呢啲婚禮，認真神奇！

苑瓊丹留鴨屎籮保財富
苑瓊丹雖然一向身材麻麻，但原來都有好處，噚日苑仔喺將軍澳電視廣播城開工時，重大膽將身上短處同大家分享，苑仔話：「啲同事成日話我鵝頸、雞胸、鴨籮柚、象腳，但有師傅就話我係鴨屎籮，會為我搵好多錢，所以自此我就保持住呢個起碼有三十八吋嘅下圍。」咁都得？咁我馮仁昭都要跟住保留一個巨躉先得。