擲22萬築高牆低調行禮
奧菜惠嫁IT才俊：勁開心

日本嘅藝人𠵱家可謂完全唔興搞盛大婚禮，最好就係有咁秘密得咁秘密。但話說回頭，又唔係個個都學松山鳥菜菜子同反町隆史咁，交張婚書就算數，仍有好多女仔想着住婚紗行禮，所以近期嘅廣末涼子以至前日擺酒嘅奧菜惠，婚禮都採取「戒嚴式」保安。

啲錢應使先使
可能奧菜惠個老公藤田晉係有錢IT人，佢見個婚禮場地喺一間開放式嘅餐廳，記者喺餐廳外圍好容易影到，最後佢索性一擲三百萬円（約二十二萬港幣），圍住餐廳起咗幾幅牆，令啲記者插針都唔入。我羅拉記得之前奧菜惠宣布婚禮只會搞一個簡單嘅homeparty，當時就有人話藤田孤寒，咁𠵱家睇嚟，人哋都係應使先使啫。

「最感動嘅婚禮」
講番婚禮情況，八十人嘅喜宴入面，奧菜惠只係請咗佢師姐菊池桃子一位藝人，菊池走時話：「呢個係我去過最感動嘅婚禮！」而後尾一對新人再搞咗個三百人嘅party，就多啲藝人去，好似窪塚洋介夫婦同雛形明子都有到場。
唔知係咪真係玩到high咗，臨尾奧菜惠終於拉埋老公行咗出露台拋花球任人影，人哋咪問佢心情點樣，奧菜惠就答咗句：「勁開心呀！」可見佢係有幾咁高興。