煲呔領導嘅政制發展小組一開工，就俾法律界雙嬌余若薇同吳靄儀搞到頭到大晒。當然北京更難搞，你話見就有得見，咪好冇面，所以梗係要計過度過先至叫你上嚟見。
不過，煲呔都唔係蠢人，一味死等，不如做吓啲更有意義嘅事情。佢老哥今會飛去日本訪問三天，同日本政府高層會面，介紹吓香港最新情況喎。八方最關心免簽證入境旅遊嘅進展，已經傾咗好鬼耐都未見有成果。煲呔今次會見日外務大臣川口順子同外務副大臣阿部正俊，唔知係咪會有好消息。
去開日本，煲呔乘機去東京睇吓六本木山文化中心嘅管理，作為西九龍文娛藝術區一個參考。當然出到政務司司長咁大粒，佢重有任務幫香港旅發局宣傳吓。至於煲呔愛將黃灝玄會唔會調去布魯塞爾，消息人士叫八方等公布喎。
傳真︰2623-9278
電郵︰