近日股市波濤洶湧，好友淡友都唔容易搵食，最好就係搵到啲新上市（IPO）股，效法中人壽、福建紫金，炒一轉就夠和味啦。
碰到靚女分析師C姐姐，捧住兩本厚厚電話簿，行得幾辛苦噃。問佢為乜事？C姐姐話：「復地招股書吖嘛，掂㗎！」點解會掂？唔通C姐姐一早已經刨熟招股書，知道係好嘢？C姐姐眉毛一挑，嬌笑兩聲：「憑直覺就知佢掂啦。保薦人係大摩，大摩以前叫公關搵我哋班同行食飯，介紹新股，介紹親都係唔容易啃嘅股。但呢次復地上市，竟然冇飯局噃，人哋咁慳，你都知乜事啦，有好嘢使乜燒鵝打人牙骹軟。」
C姐姐咁心水清，講到連菁姐都冇咁清，好啱聽啫。牛市之時，憑直覺就可以搵食，唔使分析嘅。但C姐姐之言，亦令左丁山想起，做公關，應該「吾一道以貫之」，用英文形容詞就係的persistentandconsistent，唔好做啲唔做啲，一曝十寒，否則好容易俾人捉到路，客戶傳媒識得你「有事鍾無艷，無事夏迎春」，你有何好處？答案係只有害處。
左丁山就根本唔知道復地係乜東東，只略知呢隻係內地地產概念股，去年由滙豐做保薦人，上唔到市，或者係大氣候曳啩，今年改用大摩，摩笛一吹，即刻話有幾倍超額認購，點到你唔服。內地進入小康社會境界，人民對中價內銷房需求甚大（豪宅只堪炒作），呢類股份係值得留意嘅。