禽流感嚇到人人怕，賓架陳呢日午餐時，唔肯食雞，尤其話明唔好要炸子雞、白切雞，因為粵菜做法，呢兩味美食都以剛剛熟為宜，雞骨有少少血絲紅色，雞肉先至夠嫩滑，賓架陳話如此食法，雞肉唔夠熟，並不與時俱進，切戒、切戒。
禽流感最嚴重嘅地方係越南，越南鄰近廣西、泰國，周圍傳開去，有幾難呢？以越南嘅醫療科技、衞生水平，冇外國支援，好難克服呢場災難。邊個肯做國際衞生幫呀？好多人鬧美國要做國際警察，干預他國內政。呢次如果美國唔出手，邊個願意捱義氣，拉頭纜去幫越南呢？
大編輯對街市行情好熟，佢勸左丁山轉食「嘉美雞」。嘉美雞係香港大學與嘉道理農場嘅聯合產品，百分百本地貨。二○○一年教資會邀請大學校董會主席、校長與商界大人物坐埋食飯、溝通之時，就特別指明要食香港大學嘅「嘉美雞」，以示本港科研成就。左丁山絕少去街市，唔知道有嘉美雞賣。但大編輯話：「街市有得賣㗎，隻雞比較細隻，價錢就最貴，成四十蚊一隻，但又最快賣清光，經常買唔到，聽雞販講，嘉美雞係要配給嘅喎！」
講得咁巴閉，左丁山躍躍欲試，又即刻諗起，港大徐立之校長係遺傳基因專家，對嘉美雞肯定一講就明白，正當大學喊窮、禽流感當道之際，港大不如想辦法，增加嘉美雞產量，搵番一筆，雖不致發達，亦算係一筆外快收入。之不過，嘉美雞嘅知識產權誰屬呢？