人稱「彤叔」嘅新世界發展主席鄭裕彤，身家無數，但佢原來同本地首富李嘉誠好唔同。彤叔最近接受大陸傳媒訪問，話自己七十幾歲人重要返工，真係有啲儍；但佢話細佢兩年嘅李嘉誠更儍，朝朝未到九點就趕返公司開會，所以唔鍾意同李超人打高爾夫球，因為超人朝早六點已經去到球場，但彤叔未起身。就算兩人有時會玩吓啤牌，超人會一邊打一邊講電話，彤叔好慨歎咁話：「點解要咁辛苦呢？」
彤叔話兩三年前超人曾經同佢講過話已經退休，點知而家比以前更忙。不過彤叔話體諒超人咁做唔係為自己，而係為數以萬計嘅員工，同埋重有個李嘉誠基金會，直頭為國家分埋憂。「我仍然時時笑佢，已經七十幾歲人，你攰唔攰㗎？我就舒服得多，我十一點先返工，返工亦唔多理事。傳媒報道我，我唔緊張你影到我同啲後生女一齊嘅相又點？我上娛樂版頭條又點？」彤叔果然睇得開。
傳真︰2623-9278
電郵︰