早幾日我大口羅拉放咗兩日假，但係並冇偷懶喎，一早走去昅吓嚟緊新一年，荷李活電影有乜睇頭！
近年由漫畫改編而成嘅電影，似乎成為影壇嘅新力量，前年嘅《蜘蛛俠》空前大賣，舊年嘅《變種特攻2》同《變形俠醫》等，都取得相當唔錯嘅成績，所以今年電影公司將會繼續食住呢條水。
今年嘅漫畫英雄電影，一如以往都主要安排喺暑期上映，不過講述另類英雄嘅《Hellboy》就會率先喺四月就有得睇喇。至於去到暑假檔期，各路大片都紛紛出籠，其中當然首推《蜘蛛俠》續集啦，今集由杜比麥奎爾（TobeyMaguire）扮演嘅蜘蛛俠會遇到比上集敵人更強嘅八爪魚博士，劇情自然更加緊湊。
黑人影后荷爾芭莉（HalleBerry）孭飛嘅《Catwoman》亦係奇兵一路，佢扮演嘅貓女不但擁有貓嘅反應同速度，重有亦正亦邪嘅性格，係非一般嘅漫畫人物。
而喺八月上映嘅漫畫英雄電影就有《AlienVs.Predator》由兩大經典《異形》同《鐵血戰士》crossover。而九月嘅《Constantine》亦唔能夠錯過，事關有萬人迷奇洛李維斯（KeanuReeves）坐鎮，佢飾演有超自然能力警探，穿梭於人間同地獄查案。