前《文匯報》前總編輯金堯如追思會，喺司徒華嘅灣仔鵝頸橋教協大本營舉行，全日最矚目嘅殯儀之星，就係董建華嘅前特別顧問葉國華。
金堯如係「六四」時領導《文匯報》起義嘅共黨首席叛徒，而司徒華係乜人更加唔使講，再加埋追思會主持人、曾經喺大陸坐過政治監嘅商人羅海星，及致悼詞嘅羅海星尊翁、前《新晚報》總編輯羅孚，加埋民主黨主席楊森，喺土共眼中，簡直牛鬼蛇神新界盆菜宴，葉國華深入虎穴，唔怕撻屎上阿董身，真係好有勇氣。
咁都不特止，輪到葉國華發言，佢重鬼咁激昂，話佢應邀出席咁嘅追思會，喺一啲人眼中，好似係好得人驚嘅事。言下之意，即是同金堯如呢亭共黨變節者，稍為識撈嘅，都應該劃清界線，當呢個追思會係沙士期間嘅威院E8座咁，遮眼、掩鼻，洗手、洗手、洗手，着全套董婆式太空衣，有咁遠避咁遠。
葉國華有少少憤慨咁話：點解香港會變成咁？佢跟住就憶述，自己喺左校香島讀書嗰陣，經已日日睇金堯如寫嘅《文匯報》社論，覺得佢好有「獨立思考」。
葉顧問即時表演獨立思考，話好認同金總所追求嘅民主自由，佢又指出：胡錦濤今次訪問法國，公開演講，高度讚揚法國自由思想家孟德斯鳩同盧騷，呢個訊息，十分重要，國家將會出現體制上嘅民主改革。
公然同一個反共叛徒鳴冤？冇咁大膽嘅。唔通葉總又有條線直通中南海，知道胡溫即將有民主大改革，所以佢就唔怕搶飲頭啖湯，夠膽同司徒華公開揸扒？胡錦濤認同孟德斯鳩？咁葉國華個前度老細董建華，抗拒二○○七年普選，咪夠晒戇居居？共產黨都欣賞盧騷？咁十三億人民，包括啲勞工、農夫、賤民，又點會咁多牢騷？
金堯如假假哋都係特區頭號親中左報嘅前度總編輯，董班子今日施政，人所共知，好多時係跟足《文匯報》嘅「社論」及「來論」辦事，論政治級數，一個《文匯報》總編輯，高過自以為「高度自治」嘅特區政府，金堯如前總編輯逝世，特區新聞處一個花圈都冇，董班子全體隱形，都咪話唔勢利夾涼薄。
葉國華身為資深親中人物，都係有人情味少少，講嘢至情至聖，重勝過當年未獲委為「中央政策組」首席顧問嘅劉兆佳，唔知點解，一小撮親中分子總係要曾經滄海過之後，先至識得大徹大悟，好似金總咁，好後生就加入咗共黨，重獲派去台灣做特務，要等到「六四」，先至認識到原來阿媽唔係男人，於是就對共黨作出唾棄，咁先至喺晚年去到美國，做番個自由人。
羅孚致辭，亦講到佢喺美國時時同金老敍舊，大家一致同意：美國有民主、自由，又有社會福利，美國的月亮真係特別圓！
所以八方時時都祝福美國，希望美國繼續超強盛，無論經濟同軍事，愈強愈好，永遠可以成為好似金老呢一類優質中國人嘅最後故鄉。金老，請在美國溫柔的月色下安息吧。
傳真︰2623-9278
電郵︰