雖然個市上周表現麻麻，家陣又可能受禽流感影響，但批股集資之聲仍然不絕，唔只係大藍籌或紅籌，連二三線股甚至創業板股份的配股傳聞亦絡繹不絕。
經紀陳解釋，皆因好多配股計劃，係之前一早plan定，唔可以因個市有小小轉變就即刻唔做，好似早排小初在此曾提過，聲言進軍網上遊戲的寶德科技（8236）有意配股，寶德果然在稍後公布，有意發行最多2億股新H股。
發行H股，唔似配售二三線股咁簡單，好多時半日已經搞掂，首先要開股東特別大會通過，然後再做其他工夫，所以需時較耐。
由於配售H股需要時間較多，所以股價通常都會頂得好行，好似舊年元征科技（8196）咁，在等緊配股時，股價守得穩之餘，重形成上升之勢。
由於呢排唔少大陸網絡股在美國搞上市，所以寶德配股應該唔難成事，加上有人護航，經紀陳話可以諗諗。
隻股上周五平收0.76元，成交唔算大，但已見到幕後經紀牌買出買入。
慕容小初