各大地產商為進一步推廣旗下商場業務，近排都好興北上尋找商機，好似新地就搞咗個自由行購物參觀團，招待五十位廣東省旅客，嚟香港免費玩三日兩夜。
新地舊年十月份曾經北上廣東省、上海同埋北京，搞咗一連串展覽同嘉年華會，推廣旗下商場，同期搞咗個抽獎，得獎者可以免費來港旅遊，結果收到幾萬張抽獎表格，有一百位幸運兒。
早前先安排首批五十名得獎者來港，交通費同食宿全免，重安排埋一連串節目及觀光景點，少不免參觀旗下商場，指定商戶會提供特別折扣優惠，各人可謂盡興而歸。
富城集團屬下嘅北角海峰園同鰂魚涌栢蕙苑，最近攞到環保署頒發「明智減廢」標誌，確認兩屋苑喺減少製造廢料方面作出嘅貢獻。
由環保署主辦，生產力促進局任顧問嘅「明智減廢計劃」，目的係鼓勵企業減少同管理其產生嘅廢物，採取有效減廢措施。
而海峰園同栢蕙苑管業處，除舉辦不同類型嘅環保活動同減廢活動外，喺物業通訊上都有刊登環保資訊。
早年內地房地產急速發展，香港記者經常組團到上海、北京等地採訪，𠵱家就風水輪流轉，輪到香港地產市道開始有起色，好似噚日喺傲雲峰嘅售樓處，就有一位嚟自上海國際金融報嘅記者，採訪賣樓嘅熱鬧情況，寫番篇報道。
長實趙國雄成日往返內地工作，認識唔少內地記者，噚日重親自招呼，老趙成日鬼鬼馬馬，已經周不時喺本地報章亮相，睇嚟佢今次連國內嘅見報率都多埋。
地產市況突然好轉，作為上市公司嘅美聯物業，嚟緊星期四個周年聚餐，開足二百圍，聽講係灣仔會展近年同類活動嘅新紀錄，總開支約一百八十萬，係公司歷年之冠。由於近期禽流感肆虐，當晚菜式唔會出現雞肉，而改用元蹄。
另外，上個禮拜五深圳美聯都搞咗場周年晚宴，開足三十席，參與人數近四百人，唔少同事重即場大獻歌藝，甚至自創口號，誓師效忠公司，𠱁到主席黃建業鬼咁開心。
農曆新年幾日假期，唔少香港人都出外旅遊，究竟邊度最多人去？中原就話係泰國嘞，點解？因為中記唔少同事不約而同揀咗去泰國旅行囉。聽講係貪機程短，當地有得玩，有得食，有嘢買，價錢又唔貴。
噚日中原一姐劉瑛琳就話，九龍區今年嘅營業額目標係五億，若果做到，就請晒啲區頭總共十五人，一齊去泰國玩四日三夜。行程出發期暫定明年初，若果可以半年就到達目標，就會提早出發。睇嚟各區頭都要加把勁，谷前線代理跑多啲數至得嘞。
蘭西
電郵地址：
