陳婉嫻病後復出心境一片清明，八方最近同佢傾過，嫻姐不知幾識享受人生，大講旅遊經，過年連續幾日行完山，之後又飛去日本東京，不過唔會周圍走，而係住喺新宿一間舒適嘅酒店，匿埋幾日睇好書。
嫻組話帶咗幾本想睇好耐嘅書過去，其中一本係紐約前市長朱利亞尼嘅傳記。八方知道好多人都鍾意睇呢本書，有人話特首最應該睇，因為朱利亞尼面對九一一突發事件，處理得頭頭是道，冇卸膊話因為源於不能估計嘅「外圍因素」。
嫻姐對此書情有獨鍾嘅理由有啲特別，原來佢聽講朱利亞尼同佢一樣，都曾經身患癌症，所以佢想睇吓呢位風雲人物點樣戰勝癌魔，以便向別人推介。
講起健康問題，嫻姐話佢一切安好，最大問題係唔可以同人「霎氣」。至於參唔參選，嫻姐就冇直接答，只係猛話好享受𠵱家嘅生活。
嫻姐去日本之前趁新春去行山，有一日行「蚺蛇尖」，雖然氣溫好低，但景色靚到絕，行經一個山邊大排檔食牛河醫肚，檔主同佢講，早二十分鐘就可以撞見環境運輸及工務局局長廖秀冬同佢兩位囝囝一齊行山，喺同一個檔口食嘢。
大家都趁年假四圍玩之際，八方就收到個唔係幾好嘅消息，就係台灣前駐港最高級官員黎昌意喺初十（昨日）因心臟病離開人世。
（圖）陳婉嫻去日本唔係行街街，而係匿埋幾日睇書。 資料圖片
傳真︰2623-9278
電郵︰