所謂「一山還有一山高」，咪以為畀皮利斯起咗個花名叫「大香腸」嘅阿仙奴法國中場韋拉好勁，原來佢同胞、效力車路士嘅馬基列尼（Makelele）更掂，重有尤克里里（Ukulele）、即小結他嘅稱號。
林柏特最近接受英國某本男性雜誌訪問時話，佢隊友馬基列尼雖得一米七四高，但「個人之處」就異於常人，竟介乎十八至廿四吋之間，直頭同支小結他有得揮；而連係好多男人偶像嘅阿仙奴中場韋拉、維拉前鋒杜布連同狼隊門將奧基斯，喺佢面前都要行埋一邊。
嘩！成兩呎長，我求大俠就唔係太信嘞。如果真係咁，佢跑起上嚟唔方便之餘，鏟波嗰陣時重好容易整親，似乎踢龍門啱過踢防守中場。但話時話，好彩佢唔係喺七、八十年代踢波，事關嗰陣啲波褲又短又窄，你叫佢點着呀！
賓菲加真係黑過墨斗，今屆歐冠盃冇佢份外，葡超已經俾波圖同士砵亭拋離，上周又有匈牙利球員費夏猝死，最新壞消息係財政再傳唔掂，要放走五個球員，一波未平一波又起，我求大俠第一時間諗：班球員究竟𠵱家點諗？所以周二迎戰科英布拉大學時，波友要執生啦！
曼聯中場畢特拒絕加盟伯明翰，選擇留隊至下季再作打算。之前佢已經放棄加盟米杜士堡及熱刺，加埋伯明翰，連呢幾間中型班球會都唔肯踢，唔通要阿仙奴或利物浦呢啲大會至肯制？定真係博可以過去皇馬搵碧咸呢？最怕今季你都冇乜上陣機會，季尾已經冇人吼你咋！
前晚睇重開嘅德甲聯直播賽事，多蒙特主場對住史浩克04，真係歷盡喜怒哀樂。原因係我求大俠捧多蒙特主場贏波；開波無耐多隊即獲十二碼，不過件真高拿竟然射失；後來重打少件羅斯基兼又射失另一個十二碼，愈睇就愈㷫，最後重俾史浩克贏埋，雖然輸錢但都心涼！
尼日利亞呢隻非洲「超霸鷹」，雖然喺今屆非洲國家盃第一場分組賽輸波，跟住重發生耶古保、巴巴耶路及阿加利三位主將，因為冇返到大軍集訓營瞓，違反咗球隊紀律而被逐出隊事件；點知咁樣反而重勁，噚晚即刻大勝南非四比○，唔通嗰三件係瘀血，清走咗至掂？