舊年國際投資市場中最掂嘅投資工具,除咗股票同外滙外,黃金亦表現出眾。不過伏勝認為好搵極都唔夠班石油出產國咁好搵,皆因只要油價上升,佢哋就可以袋多啲錢,所以舊年只要有涉及石油相關業務,都會有唔錯增長,好似從事石油產品貿易嘅泰山集團(1192),淨係上半年嘅營業額已經較前一年同期升咗4.5倍,舊年下半年油價仍然瘋狂飆升,佢哋收得重多。聽班有啲料爆嘅朋友講,話隻泰山好快就會公布03年全年業績,呢份成績表會好到你唔信,話唔定重會有機會派息,喺一蚊樓下不妨買啲貨嚟坐坐,應該好快會有料到。
另外,上個星期有經紀行家打電話嚟報料,話隻中國誠通發展(217)就快有得炒,皆因呢排個市開始講番話國內經濟咁好,物流業務一定會好hit。早前個市散咗落嚟,但好多隻做物流嘅股份只係輕輕咁調整少少。誠通近排由低位兩毫子左右起步,上個禮拜見過0.425元後回咗落嚟,上周五更加跌咗6個巴仙有多,不過,隻股比人質完一排後,啲買盤又會自動彈番出嚟,絕對無手軟。伏勝追問個行家隻嘢喺度搞乜東東,佢就話隻股之前做過減債,財務壓力已經細咗好多,加埋即將會有嘢要注資入上市公司,所以隻股好快就可以一飛沖天咁話,開車嘅話應該會見到5毫子。
隻股由2毫水平升上嚟,用咗1個月都唔夠嘅時間,好彩𠵱家PE重仍然係5.8倍,都叫做有啲值博率,如果唔係嘅話,打死都唔喺呢啲水位買貨。不過由於個市重未企穩,要買嘅話一定要夠定力至好,如果唔係隨時俾人拋落車都似。
伏勝