猴年年初三沙田馬場，人頭湧湧，原來係假象，睇真啲數字，原來丁財兩不旺，差過羊年。馬場投注額下降，睇嚟唔再係周期循環（cyclical）問題，而係一個結構性（structural）問題，馬會諸公會好頭痛。
馬場碰到餐廳T，佢話已經頂咗間杏花邨餐廳畀人，暫時冇頭痛，佢幾年前因銀行重組，出咗嚟，拿老本在杏花邨開餐廳，捱得幾辛苦，沙士期間仍然頂得住，叫做搵到兩餐。點知一聲自由行，市面似乎好好景（其實有幾多祖國遊客會行到去杏花邨呀？），全港商場、地舖爭先恐後咁加租，地鐵在商言商，唔執輸，碰啱餐廳T租約期滿，地鐵話要加租百分之二十幾！餐廳T計來計去，冇法子計得掂，只得舉手投降，但你唔做有人做，有人肯頂租噃！正是發達容易，搵食艱難，餐廳T白費幾年心血，又要從頭來過！
聽完餐廳T嘅苦水，想起銅鑼灣維園對面，以前有一間東湖海鮮酒家，係老字號，經營多年，街坊對之甚為熟悉，點解後來唔做，搬咗去康山呢？據講九八年間，業主要大幅加租，東湖惟有鬆人，但業主睇錯形勢，九八年之後嘅經濟，大家都知道點啦，上址丟空一排之後，業主據聞減租租畀人開辦安老院。唔知現在可唔可以加租呢？地產市道轉好，第一個得益嘅永遠係大業主，負資產小業主，希望你可繼續有工做啦。