梅艷芳生前簽下的美容院代言人合約，隨着阿梅病逝合約履行了三個月便告終，因而引起爭拗，有報道指美容院上月底向MuiMusic發信追討三百萬賠償。何韻詩前晚錄影《勁歌》時踢爆美容院老闆娘是知道阿梅有病的。
梅艷芳生前跟現代美容簽下兩年合約，但只履行了三個月阿梅便病逝，近日有人發放現代美容老闆娘曾裕（Joyce）向阿梅生前經理人王敏慧（Marianne）追討賠償的消息。
梁漢文和阿梅徒弟何韻詩等前晚在無綫將軍澳電視廣播城錄影《勁歌金曲》，何韻詩除了覺得近日報道對阿梅不公平外，還力撐Marianne。有周刊報道傳媒收到神秘光碟當日，MuiMusic接到現代美容發出追討三百萬賠償的信件。
何韻詩對Marianne和Joyce的爭拗感到莫名其妙，她前晚說：「唔應該講到阿梅專登隱瞞、欺騙同毀約，對佢唔公平，老闆娘係知梅姐有病。大家知梅姐係一個專業藝人，簽得約只會做多同做足，但如果因為健康問題影響，咁冇得好講，佢𠵱家人都走咗。況且梅姐成個過程都交足功課，佢忙演唱會都幫美容院影寫真集，助手都叫佢唔好影，但梅姐就堅持。」
對於近日矛頭直指Marianne，何韻詩說：「我唔覺得應該將整個責任推卸喺Marianne身上，佢都係幫梅姐傳話同處理各樣嘢，唔係幫佢揸晒主意，我相信當中係梅姐意思。至於退款，畀多咗咪退番，如果畀少咗，會為梅姐討回公道，咁樣公平啲。」
對於有報道指現代美容索償三百萬，梅艷芳生前的助手Donny昨日說：「嗰日（指一月二十六日）的而且確收到有關信件，件事交咗畀律師處理，唔再回應。」而Joyce昨日透過美容院同事回應說：「公司係發過封信過去，但唔係律師信，內容亦冇提過三百萬嘅字眼。」對於Joyce跟Marianne的爭拗，梁漢文昨日在赤柱出席活動時說：「阿姐（梅艷芳）嘅嘢應畫上句號，觀眾未必想知咁多。有報道重話Donny係阿姐最後一個情人，我見到呢啲新聞都暈，咁寫太離譜。」
對於梅媽表示明天會爆料，梁漢文說：「我近排冇打畀Marianne，都冇聯絡梅媽，我亦唔信蔡一智同蔡一傑不和。」此外，有報道指蘇永康和梁漢文日前到夜店消遣，但康仔曾進入女廁，離開後洗手盆的枱面留下粉末，梁漢文說：「咁樣寫對康仔傷害好大，照我知康仔冇出過房多過十五分鐘。」
採訪：卓寶花、李珮洳、比華利
攝影：仇志德
