科大校長朱經武噚日喺港台節目中話，十幾年前喺美國侯斯頓做研究時，一日突然收到當時嘅總統老布殊（即係現任總統喬治布殊嘅父親）邀請，話有個共和黨會議請佢去，朱校長竟然冇去到，請咗老布殊食檸檬。
朱校長咁唔畀面，原因係佢認為作為一個學者，應同政治「絕緣」，「教育界人士應保持獨立，政治組織我係唔會參加。」佢話當時總統叫到，作為國民嘅當然要遵從，但始終認為唔應該去，好彩剛好有一個學術會議喺另一個州舉行，佢就可以大條道理乘機甩身。
記得朱校長早排亦公開批評，政黨喺處理○四/○五年大學撥削方案一事上變得政治化，可見佢真係好抗拒政治。同樣係大學高層嘅城大校長張信剛同港大副校長李焯芬，近期則愛上政治，加入由親政府人士組成嘅論政團體「香港發展論壇」。
傳真︰2623-9278
電郵︰