遠足行山最怕撞到蛇，今日旅程就偏偏去搵蛇，蛇？神出鬼沒好難搵啫！錯，呢條蛇長期喺海邊出沒，重要擘大口，兇神惡煞，不過就得個樣，毫無殺傷力……唔使左諗右諗嘞，想知佢喺邊，即刻跟我入西貢龍蝦灣喇。
記者：陳震霖 攝影：伍慶泉
模特兒：Kevin、Zoey（Space2）
大坳門道迴旋處落車，十字路口左轉入龍蝦灣路，正式展開尋蛇之旅。
龍蝦灣路少有起伏，Kevin同Zoey行到成支箭咁快，差啲唔記得參觀途中必經嘅大雄寶殿，Kevin問：「間廟咁熟口面嘅，邊度見過呢？」Zoey係電視迷，搶住答：「你平時唔睇電視㗎，皇帝召見文武百官、武林豪傑開片群抽，好多時都嚟呢度取景㗎喇。」講得無錯，大雄寶殿的確係古裝片外景拍攝熱點。寶殿佔地8,000平方呎，屬湛山寺一部份，供奉釋迦牟尼佛、阿彌陀佛、觀音菩薩、羅漢等塑像，殿外，Kevin同Zoey玩到鬼殺咁嘈，一入殿堂就即時收口，啱嘞，話晒佛門清靜地，參觀佛寺要保持清靜呀。
出番寶殿沿龍蝦灣路進發，5分鐘唔使就到湛山寺，內有舍利塔、居士樓同功德堂供人參觀。湛山寺雖只得40年歷史，但坐落清水灣，背靠青山，面對大海，斯里蘭卡政府文化代表團喺98年嚟過參觀，評湛山寺係全亞洲環境最優美、風水最好嘅寺院，認真唔講得笑。
行多30分鐘到達龍蝦灣路盡頭，即見路標指示龍蝦灣石刻方向，石刻於1980年被遊人發現，由不規則線條同獸形圖案組成，Kevin上下打量：「睇唔明刻文想表達乜嘢喎！」睇唔明好正常，因為石刻為何物尚未有定論，一說係古代船民圖騰文化，一說只係天然風雨侵蝕，未必由人工刻鑿。
石刻對出就係「靈蛇石」，Kevin有心追求Zoey，見潮漲，唔想伊人澗水，於是就自投羅網，走埋去伸個頭入蛇口，作狀被蛇咬，逗Zoey開心。
睇完「靈蛇石」，續行龍蝦灣郊遊徑，起點有路標，指明郊遊徑全長2.3公里，1小時可以行完，呃人嘅，可能Zoey同Kevin行唔慣山喇，愈行愈唔對路，愈行山路就愈斜，重一山還有一山高㖭，1小時先行到平托坑山最高點，好彩上面個觀景台有無敵靚海景，可以邊休息邊欣賞附近島嶼：左面係平面洲、中間係大癩痢、右面係青洲。
落山勁快，唔使15分鐘，就到達山腳嘅大坑墩燒烤場，一場嚟到大坑墩，𠵱家又咁好風，梗係要放吓風箏，無帶風箏？小食亭即場買番隻（每隻$25至$40）咪得囉。
最後一站布袋澳，因為海灣形如布袋，故有此名。一位唔願出鏡嘅村民話：「100年前，布袋澳好繁榮，水路交通發達，4族村民主要姓鄧、詹、林、陳，時移世易咯，𠵱家條村愈嚟愈少人。」近年，布袋澳村嘅養魚業及捕魚業式微，村民主力發展海鮮食肆，將布袋澳變成食海鮮熱點。
要欣賞漁村風光，梗係要玩吓扒艇仔喇，Kevin唔放過呢個一親伊人嘅機會：「在水中央，有儷影一雙，彷似畫在湖上……」邊唱情歌邊扒艇仔，好浪漫！
陳記小艇（93587730）
收費：平日每小時$30，星期六、日及假期全日$100
又到醫肚時，知道Zoey鍾意食蝦，Kevin即點白灼海蝦（每両$6），因為白灼先食到海蝦嗰份鮮味，不知不覺成斤蝦落肚，再嚟碟豉椒炒蜆（例牌$75），蜆肉夠多夠大隻，重未飽，整多碟落足料嘅福建炒飯（$60），兩口子食完話下次要返嚟幫襯，皆因好味到唔停得口也。
海鮮島漁港（27195730）
地址：九龍清水灣道布袋澳村6號地下
營業時間：星期一至日11:00am至11:00pm
1.訪「靈蛇石」：鑽石山地鐵站乘91號（$6.1）巴士，大坳門道迴旋處下車，左轉入龍蝦灣路。
2.訪布袋澳：大坳門迴旋處乘16號（$4）小巴，總站布袋澳村下車。
3.回程：布袋澳村乘16號（$7）小巴回寶林地鐵站。
