喺娛樂圈做嘢，揀朋友好重要，如果識到啲壞朋友，咁就有排煩！做藝人呢行，無論係男定女，都會比普通人容易覺得空虛寂寞，呢啲時候就最容易俾啲壞朋友埋身。
好似某女藝人咁，向來對愛情好有憧憬，但拍親拖都係分手收場，所以成日覺得好唔開心，佢個壞朋友就帶佢去泰國蒲吧𠝹仔，但喺呢啲咁嘅地方識男朋友，同叫鴨冇乜分別，女藝人早幾年有個泰國男友，就係佢嘅壞朋友介紹嘅。
壞朋友除咗向女藝人埋手之外，圈中兩位同志男藝人，都同壞朋友交情好深，壞朋友亦經常帶佢哋去泰國𠝹仔，所以呢兩位男藝人都識到泰籍男友，重搞到同身邊嘅另一半感情出現問題。壞朋友嘅行徑好多圈中人都知，背後都話壞朋友同做扯皮條冇分別。
陳豪大前晚十點幾，一個人喺跑馬地一間咖啡店歎咖啡、睇雜誌同上網，唔知佢係唔係發現有記者影相，最後居然喺後門走咗去攞車。馮仁昭覺得一個人飲咖啡又唔係唔見得光嘅事，點解陳豪要走後門咁閃縮呢？
彭羚（Cass）日前接受周刊訪問，親口承認再度懷孕已有三個月，原來阿Cass喺聖誕時同囡囡林泳返咗加拿大探親，有日佢抱住個女唔小心喺樓梯碌咗落嚟，之後返到香港即刻睇醫生，一驗之下就發現有咗BB。本來阿Cass六月會擔任美國爵士樂手BobbyMcFerrin音樂會嘅嘉賓，但佢話已經推咗，而佢老公林海峰當然開心又緊張啦，馮仁昭都戥佢哋開心！
王從希早前先至話同圈外男友甜甜蜜蜜，不過佢噚日喺電話度話已經同男友分咗手，佢話：「今年情人節都未諗到點過，我𠵱家都有好多人追，或者到時搵到新男朋友都未定。以前嘅男朋友都想追番我，不過我哋之間真係好有問題。」
陳慧嫻日前接受寵物雜誌訪問，佢一向係愛貓之人，但細個都有養過狗，佢日前接受訪問時話：「我養過嘅狗一生好傳奇，佢試過咬到一名女鄰居，結果要罰去漁農署坐監，不過最後隻狗都老死咗，之後我都冇養狗，改為養貓。」咁又係，細個有咁嘅傷痛回憶，大個都未必會再想重溫番嘅！
退出樂壇十年嘅許冠傑（Sam），因為見舊年發生咗好多唔開心嘅事，所以憑歌寄意寫咗首《04祝福你》，鼓勵港人積極面對新嘅一年。馮仁昭聽講商台覺得呢首歌好有意思，所以攞咗呢首歌做二台台歌！事實證明，歌神阿Sam雖然退出樂壇咁多年，但對廣大市民依然有好大影響力。
林建明噚日去港台接受訪問時，透露藍潔瑛星期一要等醫生檢查多一次，先知可唔可以出院。醫生話藍潔瑛進展得好好，而林建明就話好想聯絡容錦昌，重叫記者幫手搵對方嘅聯絡電話，佢話遲啲會成立一個慈善基金，去幫助一啲有需要嘅人。另外，杜挺豪噚日帶咗雪梨湯、朱古力同薯片到醫院探藍潔瑛。
