Twins昨日到屯門宣傳電影《見習黑玫瑰》，吸引大批歌迷到場，其中站在前排的歌迷被推撞得驚叫及大哭起來，場面一度混亂，三名警員到場了解情況。Twins成員蔡卓妍對於Shine的黃又南指與她同遊泰國後，感情增進不少，她昨日一口否決二人有發展機會說：「冇發展機會，我當佢係細佬！」更表示自己鍾情年紀較長及有本事的男人。
二人女子組合Twins和鄧健泓昨日到屯門出席電影《見習黑玫瑰》畢業大典，三人還與現場觀眾玩遊戲，參加者扮Twins耍蛇拳和醉拳。
昨日吸引了約二百多名小朋友及歌迷到場，約有七名保安員在場維持秩序，不過歌迷的反應十分熱烈，活動至中段，圍觀者已你推我擁，站在欄杆前的小朋友被後排的人群大力推壓，場面十分危險，有些被嚇得大哭起來，要勞動保安員抱離現場，三名警員則到場了解情況。
事後Twins得知有歌迷嚇至哭起來，十分緊張地說：「係呀？我哋成日都叫佢哋唔好推，早知係咁叫佢哋去後台，安全最緊要嘛，下次唔好再推喇！有乜意外我哋都唔開心。」
之前一度傳Twins成員蔡卓妍（阿Sa）暗戀Shine的黃又南，二人同遊泰國，又南更指旅行後與阿Sa感情大增，問阿Sa會否感到又南暗戀她？她說：「我哋感情好純潔，係好朋友，出嚟都好大方，佢細我一年，我只係當佢細佬，永遠都係，連生日卡都係咁寫。
「我唔鍾意呢類型嘅男仔。我同佢冇發展嘅機會，我鍾意啲年紀比我大嘅人。我同佢只係兄妹（應是姊弟），佢平時都叫我家姐。」
至於阿Sa喜歡哪類型男士，其拍檔兼好友鍾欣桐（阿嬌）為她解話說：「佢鍾意啲叻啲嘅人。」那麼又南不夠叻嗎？阿Sa補充說：「唔係，係鍾意大啲嘅，佢唔係話又南。」
此外，Shine昨日出席在環球嘉年華舉行的活動，Shine稍後會到台灣發展，問二人可會在港度過情人節時，二人均說未知，更堅稱沒有情人。
記者取笑成員黃又南有阿Sa相伴，又南澄清說：「我同阿Sa真係冇嘢，其實我同佢好似家姐同細佬咁，唔好成日話佢暗戀人，其實佢都好多人追。」問他會否和阿Sa上契？又南說：「話唔定㗎，不過呢啲嘢都係在心中好。」
採訪：王連連
攝影：陳偉權
