區議會選舉受到重創嘅民建聯，面對九月立法會嘅生死戰，正密謀如何收復失地，好似原本嘅「老巢」灣仔區，舊年十一月連區議會前副主席孫啟昌都慘敗落馬，真係唔講得笑。
有民建聯中委同八方講開，話孫啟昌落敗後，有街坊行埋去安慰佢，話佢真係好做得嘢，不過自己都冇投佢一票，點解？咪因為「民建聯」嘅招牌累事囉。
民建聯葉國謙噚日同八方講，該黨中委已經開會通過，成立多兩個地區支部，就係灣仔區同離島區，令全港十八區都有支部，可以密密做地區工作。其實民建聯喺離島區議會選舉嘅得票率都唔錯，但睇緊啲冇壞。
葉國謙唔否認成立新支部係配合立法會選舉，佢話區選前已有咁嘅念頭，區選嘅結果催生呢兩個支部，灣仔區由孫啟昌做支部主席，離島支部主席則係周轉香。
傳真︰2623-9278
電郵︰