眼見特首表現咁不濟，難怪香港人成日懷念過往嘅高官，陳方安生就係其中表表者，噚日陳四萬向過百位銀行界精英演講，呢班社會中流砥柱除咗想知陳太對政治、經濟嘅高見，重有興趣知佢咁成功，喺個人生活方面有咩心得。
陳太講咗三點，第一係做人最緊要有原則、有宗旨，知道自己做緊啲咩，先唔會左搖右擺。另外，工作繁重，要搵啲嗜好平衡一下壓力；第三亦係最重要一點，就係要有個好似陳太老公咁支持同理解自己嘅伴侶。
睇睇吓，呢三點董特首都可以參考吓，尤其係第一點，若再嚟多次「八萬五」、「數碼港」就大件事；至於第二點，阿董話過自己工作時間「7-11」，好似近來少咗見佢耍太極㖭，弊。董太呢，八方肯定佢好支持老公，但佢唔識學吓陳生咁低調，一句「千祈、千祈、千祈、洗手、洗手、洗手」，語出驚人。雖然陳太噚日猛咁鼓勵多啲香港人參加政黨，又話成熟嘅政黨唔係樹上生出嚟，可惜，陳太話好享受呢個階段嘅生活，佢嘅生命中，最唔重要嘅就係「權力」同「名氣」，睇嚟暫時無意積極蒲頭參政。八方諗起成日話自己「要走好容易，留低先要更大承擔」嘅阿董，惟有歎句港人何其不幸，點解兩個嘅諗法唔會掉轉？
（圖）陳方安生噚日向過百位銀行界精英分享成功心得。 陳亮華攝
傳真︰2623-9278
電郵︰