煲碟王︰闊屏幕dts刪剪片段<br>《24》DVD升格電影版

煲碟王︰闊屏幕dts刪剪片段
《24》DVD升格電影版

早半個月前，網上放風《24》第二季套裝將會「不日推出」！幸好得利影視正式公布嚟緊星期四（2月5日）推出！DVD套裝版比電視版更優勝之處，是有dts音效、16:9闊屏幕，最正係加插片段、刪剪片段及製作特輯總數45段，相對番電視版當然係好睇得多啦！

記者：朱崇德

呢套《24》可以話近年來拍得最成功的電視電影！格式非常破格，故事主要講述一日內所發所生的「反恐」事件；24小時、細分成1小時一集（共24集），有實時感覺之餘，亦有爭分奪秒的洶湧壓迫力！

新《24》玩核彈危機
今集故事承接「第一季」度結尾，傑克在搗破「總統候選人暗殺事件」和「妻子遇害」的18個月後，傑克因心理未能平復關係，所以已離開反恐小組（CTU）。由於他女兒金芭仍未能面對母親的死，是與自己父親有關，兩父女的感情亦變得疏離。一天，傑克收到總統的特別任務，得悉一枚核彈將在數小時後於洛杉磯爆炸，情況嚴峻逼人，本來厭世的傑克惟有再披起戰衣，接受此項任務。

■今集的參演演員，差唔多同第一季完全一樣。

■時間顯示係此片特色，令大家有一種壓迫感覺。

16:9超強電影感
《24》第二季，其實早前已經在香港英文電視頻道作全輯播放，不過睇DVD版令人最感動之處，就是由原本4:3的電視度，Upgrade作16:9（1.78:1）的電影視效；講真全條片大部份章目，都係以「暗黑色調」作表達，DVD版畫面睇起上嚟，感覺真係實淨、清晰好多！而且更唔少得嘅，當然係臨場感十足的5.1音效啦！相對電視版同《24》第一季度只得立體2聲道，今次可謂落重本！

■傑克今集一開波勁玩頹廢Look，不過一攞起槍搞反恐，成個人馬上脫胎換骨。

■美國情報機關以嚴刑逼供一恐怖分子，得知洛杉磯24小時內會受核彈襲擊。

45段獨「加」片段
追加片段特別多，亦係今次7碟套裝版的強銷賣點！首先是收錄電影劇情的首6張碟版，基本每小時的章目，都會有追加「加插片段」，而討人歡心者，係佢在播放原裝本版後，再作加插播放，好等大家方便比較！要作出識別都唔難，事關「加插片段」行2聲道，如果家有5.1影視系統，感覺應該幾強烈！另外，第7張是Bonus碟！內裏還會收藏20多段重未曝光片段，兩者相加就差唔多有成45段加長片，所以比電視版真係睇多好多！