藝人做乜事都好易被人張揚開去，所以凡事要檢點，但有時自己自律都唔夠，屋企人嘅行為都會影響藝人嘅聲譽，好似有個女藝人，佢本身幾乎唔係好事都唔做，點知有個唔生性嘅屋企人，成日借佢個名招搖撞騙，搞到女藝人不時要出面執手尾，馮仁昭都覺得幾陰功！
女藝人一直無條件接濟屋企人，點知重要俾佢哋呃錢，女藝人傷心之餘都學精咗，照顧好屋企人嘅基本生活後，就唔再供應金錢。點知佢屋企人太貪心，搞咗間中介公司話做生意，專門幫藝人接登台騷抽佣，女藝人以為屋企人終於腳踏實地，於是大力支持，點知佢屋企人幫啲歌星接晒美國登台騷，傾得有紋有路，到埋門一腳收晒主辦單位嘅錢後，竟然走路，人間蒸發。
女藝人知道後嬲到出煙，因為啲歌星個個諗住接頭嘅係女藝人屋企人就信晒佢，到咁嘅地步女藝人冇面之餘都唔知點同人交代，啲歌星未收錢梗係唔去唱，女藝人惟有幫手擺平主辦單位，之後佢重四圍打電話叫人以後唔好理佢屋企人，以免受騙，真係心噏過心噏!!
王菲自從傳出同謝霆鋒甩拖後，不時被指有新男友，農曆年阿菲同個女竇靖童返北京過年，有雜誌影到佢同個型男出雙入對，重話型男住喺佢屋企。阿菲經理人陳家瑛噚日喺電話度話：「嗰個只係普通朋友，亦唔係喺阿菲屋企住。」馮仁昭八到原來呢個型男係竇唯妹妹竇穎嘅男友。竇穎幫阿菲湊女，住喺阿菲屋企，佢男友有時都會去住吓。
有報道話陳松伶最近出減肥自傳搵佢契爺楊貫一包銷三萬本，而楊貫一又揼朋友心口再包銷多三萬，激到松松死死吓，松松話：「封面同封底好清楚講明呢本係美容書而唔係減肥書，另外，有數據我本書係印咗三千本，如果我賣六萬本咪賺成四百萬？真係作到離晒譜！」
雖然話禽流感依家喺泰國肆虐，但係啱啱開幕嘅曼谷國際電影節，依然吸引到各國嘅明星專程捧場。其中內地女星白靈，唔單止出席電影節活動，重自動幫泰國宣傳旅遊。馮仁昭見佢一時走去按摩，一時又去做spa，重着到鬼咁性感四圍遊街，似係去玩多過參展囉！
噚日一度傳出容錦昌自殺身亡嘅消息，真係大吉利是，好彩佢喺下午五點鐘就喺佢老竇位於西環嘅麻油廠度出現，當記者見到佢嘅時候，問佢有關嘅消息，容錦昌就即刻黑口黑面，兼且急急腳走番入去麻油廠，全程冇講過一句說話，咁又唔怪得佢嘅，新年流流咁傳法，係人都嬲啦！
林子祥（阿Lam）同陳鍵鋒噚日到港台出席《天空之城》記者會，抱病在身嘅阿Lam表示自己患上感冒，但稍後要到內地演出，佢話：「我呢幾日一定要好番，情人節要返內地做騷。不過我唔係咁擔心禽流感，因為自己食嘢一向都好小心，而且一直都唔食野味。」
傅天穎（奀妹）噚日喺中環出席減肥堂記者會時，遲咗成個鐘，先見到佢施施然坐住架跑車出現。見奀妹個樣攰攰哋，問佢點解遲咁耐，佢話：「唔知呀，我今朝先喺台灣返嚟，等攞行李遲咗，同埋噚日喺台灣拍劇拍到好夜，唔好意思。」咁啱噚日有兩個瘦身活動，但奀妹着得比較密實，佢就話唔怕比其他人輸蝕，因為佢本身瘦咗好多，要憑真材實料取勝咁話！
