話說馬主H九四年新春到車公廟求籤，得七十六中籤，一年後（九五年初），籤文完全應驗，馬主H囊空不見舊同袍，幾乎瓜得。事後檢討，支持佢收購一盤生意嘅有兩個集團，一個係大財團，一個係交情甚深嘅基金經理。因生意唔順利，蝕大本，雖然漸有起色，同事搏命，但「人情反覆似波濤」，財團首先以「策略理由」，不再支持，跟住基金經理話獨力難支，冇人情講，正是「勿謂金蘭結義高！」然後馬主H搵人做白武士收購，結果俾一個假武士玩殘咗，而呢個假武士係一早就同馬主H拍晒膊頭，禮賢下士嘅。事實證明，所有人都係「金重利」，人情反覆，冇金蘭結義情講。
劉紳士求得呢支籤，唔值得恭喜。分分鐘香港特區嘅最高層會被北方捨棄，一啲同高層稱兄道弟嘅人就係擲第一嚿石頭嘅人，到時高層雖不至冇錢（搞政治啫，唔係做生意），但倉皇辭廟，與舊同袍講拜拜都講唔切，在所難免咯！
各位老友，如果你哋做生意、問前途、求升職，求得車公第七十六籤，千萬要小心呀，平時friend過打band嘅人，最信唔過。嗰啲所謂專家，睇見係中籤就一片唱好，雖不是一派胡言，亦算言不由衷。此籤分明就係講香港政治局面反覆，人事不穩，高官勾心鬥角，政黨為咗立法會選舉，爭提名、爭排位，更冇兄弟情講。一言以蔽之，特首要小心人事！