過去一年立法會同政府成日紮馬，不過新年新開始，大家都暫時放低啲刀刀叉叉食番餐飯，噚日主席范徐麗泰就喺立法會筵開五席，請晒老董同佢班問責官出席，每席重有個以「猴」做主題名堂，好似老董嗰枱就叫「齊天大聖」。
據知席間都係只談風月，不談政事，講講吓老董又話航運業好好搵，梗係諗起佢祖業東方海外股價係咁升啦；孫明揚同葉澍堃就勸班議員咪鬼搞議員官員足球賽，改為搞麻雀大賽重好！
主席范太就每人送咗一個閃燈心形徽章，同埋一個搖擺青蛙筆座連筆，隻青蛙重識隨住擺動張開口，范太話寓意「議員口噏噏，官員筆搖搖」，立即記低議員講嘅嘢，但有多事議員就話青蛙左搖右擺，似足議員立場左搖右擺勁轉軚！范太又希望特區政府發揮猴子七十二變本領，用機智靈巧、變通手法搵到香港發展定位。
（圖）范太送嘅搖擺青蛙筆座，隻青蛙會擺動張口，寓意「議員口噏噏，官員筆搖搖」。
傳真︰2623-9278
電郵︰