恭喜發財！眾人媽打李麗娟恭祝《蘋果》讀者猴年身體健康，工作順利，學生就學業進步，香港經濟起飛個個有嘢做，大家一團和氣，和氣生財。
講開猴年運程，八方先知道原來民政有咁多隻「牛」，全部都係四九年生，包括局長何志平、李麗娟、余志穩同埋關永華，聽講猴年對牛有利，希望民政今年都事事順利，港人安居樂業。
李麗娟過年前搬咗去佢準備用作退休之用嘅新居，由於未及拆箱，所以暫時唔可以招呼太多人客，遲吓等佢由加拿大同老媽拜年同公幹後，就會搞得掂。
但林鄭月娥已經收到風，知道媽打喺麥當勞道嘅新居好寬敞，可以容納好多人，日後沙士孤雛聚會，唔使周圍搵地方。李麗娟當然無任歡迎，佢話新年期間已經同啲沙士家庭喺電話傾偈拜年，佢哋心情好好，郭名慧個小弟弟翔星九個月大，最近出咗一隻牙，好趣致㗎！
傳真︰2623-9278
電郵︰