滙豐（005）企定定，恒生（011）更靚仔，可惜兩隻內地電訊股唔生性，中移動（941）同聯通（762）夾埋，為恒指「貢獻」63點跌幅，如果佢哋企得穩，恒指昨日不但唔使跌，重有進帳。
剛剛推介嘅滙豐Call輪9274，以及兩件恒生Call輪9162同9229，都有錢賺，可以揸多一朝半日，博佢再跑一段，但係若見個市唔對路，就要快手計數。
H股指數續挫42點，但跌勢已放緩，個別H股更有好表現，中外運（598）就彈升4.6%，收報3.4元。中外運有兩件備兌認購證，1件標準輪，1件特種輪，標準嗰件係9310，是日大升25%，成為輪王。
9310現價20.6仙，玩到6月18日，溢價去到49.6%，槓桿率16.5倍雖然夠大，都係覺得佢太貴。呢件交投稀疏，買賣差價又闊，莫講話揸，就算短炒都要諗清楚。
二三線股個別亦有硬朗表現，華豐（364）逆市升3%，收報1.04元。華豐有件公司輪2303，受正股帶動升10.4%。
2303現價37仙，明年8月始到期，但竟有負溢價1.9%。隻輪咁快有折讓，大概係因為正股下個禮拜會除息2.25仙。計埋除息因素，2303溢價應為0.25%，槓桿率2.8倍，咁嘅數據依然抵買，缺點係成交唔多。
章盛