無論喺日本或香港，都被譽為係K-Car鼻祖嘅鈴木WagonR，自1993年9月於日本本土推出至今，轉瞬間已超過十年時間，而且重為小車帶來廣闊車廂，以及獨特個人空間嘅定義；最新屬第三代嘅WagonR，已於去年9月響日本推出，新車以「可適應不同車主和用途嘅萬能小車」為開發概念，並繼續受當地嘅K-Car迷追捧，同時更令WagonR響短短十年時間內，累積銷量高達二百萬部，確立咗佢喺日本小車界中嘅領導地位。
廠方為紀念WagonR銷量錄得如此佳績，故於剛過去嘅1月26日，特別推出一款名為FXLimited嘅限量特別版；新車除採用咗特別塗裝嘅鬼面罩、全車加裝擾流器外，車高更被調低10mm，務求令造型望落更具跑味。至於車廂方面，廠方更特別為其換裝一套MD/CD連6具揚聲器嘅高級音響組合、銀黑兩色真皮軚環，同埋跑車化嘅銀色表板，絕對稱得上係跑味十足㗎！相信呢款特別版嘅推出，定能令WagonR再度成為車迷焦點所在呢！
