雖然傳媒近日大肆報道禽流感消息，專家更警告殺傷力比沙士勁，甚至可導致30萬港人死亡。不過從市面所見，香港人反應唔算太震驚，充其量只係暫時唔食雞（阿虎一邊寫稿一邊食緊雞髀），港股跌至13200水平已趨穩定，全日收報13289，跌44點，但成交就縮至186億元。
在大自然世界中，病毒日日都可以變種，問題只係會否演變成人類的疫症，除非將所有人鎖在氧氣箱內與自然界隔絕，否則無論任何政府都唔可以令國民避開禽流感，所以驚都係多餘，大家不如進一步提升EQ，好好珍惜生命的每分每秒。在股市中，就可以炒吓醫藥股。
大市輾轉下跌唔難估，但估唔到連粵啤（124）獲喜力入股呢個利好消息支持，都難以避過一跌，收報1.94元，跌5.4%，成交2106萬元。市場似乎關注廣東控股減持的不利消息，多於喜力入股的利好消息，呢一種現象正正反映市場人心虛怯，恐防大股東趁高沽貨獲利。事實上，港股亦有成交縮減現象，現時唔沽更待何時？
前日被和黃（013）減持的中聯系統（757），噚日宣布停牌，雖然減持的貨源尚未發行，但市場可能當係利淡消息炒，稍後復牌時，真係禍福難料。
華置（127）大股東減持4千萬股後，跌1.5%。華置街貨唔多，走勢對市場的啟示作用有限。
萊福（901）表示有投資者洽購2億股，現時每股叫價為0.12元，較周四收市高1倍，刺激該股一度勁升至0.09元，回至0.071元收市，升幅收窄至18%，後市走勢要視乎交易是否落實。
阿虎