雖然大市連跌3天，但投資者認購新股熱潮未減。復地集團（2337）招股，據講無論機構性投資者或者散戶，認購反應都相當不俗，令小初有小小意外。
近日中國海外（688）同越秀投資（123）都可以成功批股，睇嚟大陸地產股尚未炒完。經紀陳表示睇好麗豐控股（1125），佢覺得咁多隻大陸地產股之中，麗豐炒味最濃，風險雖高，潛在升幅巨大。
經紀陳話，麗新發展（488）一系債重，雖然成日話債務重組計劃就快落實，但仍然只聞樓梯響，不見人下來。呢系股股份之中，最有炒作條件就係麗豐，皆因佢係唯一有錢賺，加上公司在廣州同上海確係有唔少房地產，要借勢炒起並唔難。
麗豐股價近排升咗唔少，但除咗經紀陳話尚有上升空間外，與麗展系相熟的某證券行，近日亦出報告唱好，set到麗豐嘅目標價鬼咁高，聽講成0.80元咁多，真係信不信由你。
麗豐噚日股價略見回落，微跌1.35%，收0.365元，成交股數2691萬股，金額1002萬元。
慕容小初