西貢唔少短期轉手賺大錢，有啲重係無心插柳。
利嘉閣西貢分行高級經理黃富傑話，啱啱做咗單銀輝別墅，業主半年淨袋二百幾萬。呢座雙數屋，千九呎，另花園千五呎，連雙車位，以千一萬成咗，屬市價。
原業主舊年買入，見佢標致，好鍾意，諗住長揸唔賣，收租算。點知有人出價高三分一話要。冇話有錢唔賺㗎，只好忍痛割愛。
黃富傑講，業主喺內地有好多生意，包括飲食、旅遊及開廠，非常忙。佢好少喺香港，為咗做成單嘢，公司派專人送定去上海。
買家係第二個區外籍客，住開南區大宅。點解轉嚟呢度？黃富傑解釋，原來佢唔少朋友搬咗入嚟。而且用相近價錢，喺南區就搵唔到好似𠵱家咁大嘅洋房。
佢睇咗三四個月、十幾個盤至揀到呢件。
銀輝別墅位近大路，設施多，附近又有超市，加上業主用咗成百萬全面裝修過，合晒要求。
新年伊始，美銀亞洲照舊請一眾記者春茗，重有紀念品。唔知係咪銀行界對錢特別敏感，份禮物同錢有關，而且勁有意頭。
原來係將28個金幣（1毫子金色錢幣），放入袖珍透明玻璃樽（圖二），送畀記者，意思係「二八易發」。
唔好以為就咁簡單，美銀行政總裁錢乃驥話：「個玻璃樽上面重有個窿，即要發到出嚟！」
份禮唔重，但就夠心思。
「君臨天下」四個字夠氣勢，好受發展商歡迎。先有寶翠園一期二十四個頂層複式以此命名，後有恒隆九龍站上蓋，現在輪到土瓜灣傲雲峰，第七座五十樓以上相連戶，撞名撞到七彩。
唔知發展商係咪搵人算過，呢四個字嘅筆畫，有利賣樓呢？
恒隆君臨天下真係着數，未開賣已經有其他行家幫佢免費做宣傳，不過人哋九龍站一路都話意向價一萬蚊呎，𠵱家土瓜灣君臨天下就賣三千幾，唔知真係會畀佢混淆視聽。日後同人講君臨天下，睇怕都要進一步講明係邊個。
樓市發展不斷轉變，地產代理要順應潮流，先至搵到食。好似近排炒家（即確認人）用摸貨形式，放售單位獲利個案愈嚟愈多。
呢類買賣同一般有啲唔同，香港置業最近舉辦了「確認人大解構」課程。
透過小組討論、個案分析及填寫臨時合約練習，等前線代理，可以對呢種買賣模式有多啲認識，以及知道有乜需要留意。
課程咁貼市，吸引到逾六十個代理參加。
上市公司富豪酒店赤柱富豪海灣，呢個月做咗十二億生意，賣出三十二間獨立屋。
代理界話，咁多年嚟，南區未試過一個月做咁多宗獨立屋。
淨係美記，就做咗十六間，值六億，成為冠軍，趁農曆新年，喺銅鑼灣搞法國餐春茗。
個盤賣得咁好，席上富豪酒店執行董事范統，同埋美聯董事陳坤興，自然飲得杯落。唔知係咪賣豪宅嘅發展商都豪氣過人，當晚二十幾三十人，飲咗十八支紅酒。原來范董係飲得之人，陳坤興都唔弱，起碼飲咗二十幾杯。
蘭西
電郵地址：
