曾叱咤車壇一時嘅寶馬6系，自廠方決定令之重生後，瞬即惹來世界各地車迷嘅注視，而繼硬頂版嘅645CiCoupe正式推出後，改用軟篷頂作配搭嘅Convertible開篷版，亦會緊隨於今年3月登場；新車各方面都予人一新耳目嘅感覺，其中獨特嘅造型以及出眾性能表現，更成為新車賣點之一。試問有興趣嘅你，又點可以錯過呢？
記者：鄭達基
德國寶馬車廠，其實早於1931年已推出一款擁有15匹馬力輸出、並有多個不同座椅數目選擇嘅3/15PSConvertible開篷車，當時已極受車迷歡迎；隨後至今73年內，廠方亦曾推出唔少家傳戶曉嘅開篷車，其中最為車迷所津津樂道嘅，實非M3高性能開篷跑車莫屬。然而，今回廠方為重生嘅6系推出開篷版本，相信又會再一次成為車迷茶餘飯後嘅好話題。
若要將改用電動軟篷頂示人嘅645CiConvertible，與645CiCoupe硬頂版喺外形上作出比較，筆者只能以一句「一樣咁型！」去形容；皆因廠方特別為佢哋，勾劃出一個流暢嘅車體線條，襯以一組略帶有同廠7系豪華轎車影子，兼附有AdaptiveHeadlights技術嘅Bi-Xenon大燈，以及已成寶馬汽車標記之一嘅鬼面罩組合，一份叫人難以抗拒嘅跑車韻味，油然而生。
另外，廠方除為新車裝配一套賣相獨特嘅18吋跑車合金胎軨組合外，一組LED尾燈更加入咗BFD（BrakeForceDisplay）系統，當遇上緊急煞車時，煞車燈亮起嘅範圍會擴大，從而令行車變得更安全。
就打開車門所見，新車嘅鋪排與硬頂Coupe版亦有不少相近嘅地方；除車廂空間同樣以寬敞實用為賣點外，兩排以高級真皮鑲嵌嘅座椅，又見有十足承托力，其中一雙前排更屬仿桶形設計㖭！另外，電動軟篷頂開關亦甚為容易，只需輕按設於車內嘅控制鍵，便可於25秒內完成整個過程，而且全不假於人手，可謂既簡單又方便。
設備配搭方面，除備有基本嘅電窗、電鏡外，另外響一體式中控台上，更備有原廠冷氣、高級音響，同埋享負盛名嘅i-Drive系統，加上各項設備鋪排得簡潔有序，操控變得方便容易；當然唔少得重有堅固車架結構、多個安全氣袋等配備，去保障車上乘客若不幸遇上意外時嘅安全啦！
當打開645CiConvertible嘅引擎蓋，一台附有VALVETRONIC及Bi-VANOS技術嘅4.4公升V8偈，就會呈現響你眼前，佢不但擁有高達333匹嘅強勁輸出外，而且重有運轉寧靜及低耗油量嘅特性；另外，一套DDC（DynamicDriveControl）系統更可按實際需要，去改變引擎吸氣量，從而令車子有更佳性能表現。與此同時，廠方又為新車安排6前速手波或6前速Steptronic半自動波作配搭，而備受車迷歡迎嘅6前速SMG波箱，亦會成為選擇配搭之一呢！
喺擁有剛勁底盤配搭嘅同時，一套經過精心調校嘅跑車懸掛系統、四輪18吋高性能輪胎及多套電子系統，亦成為新車標準裝備，加埋四輪高效能碟煞，出眾嘅循迹及制動表現，實能予人十足信心呢！
寶馬645CiConvertible小檔案
引擎：4398ccV8DOHC
馬力：333ps/6100rpm
扭力：45.9kgm/3700rpm
懸掛：（前）柱式獨立
（後）多連桿
制動：（前）透氣碟
（後）透氣碟（ABS）
輪胎：245/45R18
0-100公里：6.1秒
極速：250km/h
平均耗油：11.5L/100km
