猴年伊始，A1董趙洪娉靜極思動。董太噚日出席一個婦女福利會新春團拜，又再發揮「所長」，繼於沙士巡區時叮囑大家要「洗手、洗手、洗手」，今次再創新猷。佢大讚港人做義工好有凝聚力，「今日嘅女性要發揮互助嘅精神，最後唔好介意我用祖母口脗講：保重、保重、保重。」
講到新春好節目，董太話同啲孫喺粉嶺別墅過；咁新年有冇親自下廚煮幾味？「我好為食，梗係有啦，新年都有食蘿蔔糕、年糕，噚晚我重整嫩雞燴麵食。」咦，董太唔怕禽流感咩？「怕乜，整熟咗。」八方覺得董生真係有口福喇。
董太喺婦女會好掂，但喺另一場合就開口夾着脷，講日文嗰陣食晒螺絲。話說董太同何志平噚日出席「亞洲日本花藝展」開幕禮，董太特登用日文致辭，非常識做。
點知董太嘅日文原來唔係好掂，除咗要頻頻睇貓字，重讀得好慢，短短兩、三分嘅演詞，董太就食咗三、四次螺絲。好彩班日本仔好識做，董太講完之後竟然猛拍手，令董太冇咁尷尬。八方勸董太第二時致辭嗰陣唔好扮嘢，講廣東話都唔會有人敢怪你。
傳真︰2623-9278
電郵︰