朱茵、恬妞、李蘢怡和張玉珊等人，昨日齊齊出席修身堂分店開幕禮。張玉珊透露曾有意找上月去世的梅艷芳任豐胸代言人。談到現代美容中心近日與阿梅經理人的爭拗，張玉珊表示令她明白代言人的健康十分重要，透露今後會為代言人買重保險以保障她們的利益。
朱茵、李蘢怡（Tiffany）、恬妞、楊小娟及丘凱敏等修身堂代言人，昨日與老闆娘張玉珊齊齊出席修身堂沙田分店開幕禮，而代言人之一的鍾欣桐因要拍廣告未能出席，由同公司的2TMaggie和Mandy代表出席。一眾代言人中，以年紀最大的恬妞最為搶鏡，穿上一襲開胸黑色短裙的她，當場將被譽為性感女神的朱茵比了下去，而Tiffany則穿得頗密實。
曾遇未履行合約代言人
近日現代美容中心老闆娘Joyce與梅艷芳生前的經理人Marianne就阿梅生前簽下的合約發生爭拗，美容院不滿有人在阿梅生前未有清楚交代其病情，要求交代和賠償。昨日問到修身堂老闆娘張玉珊若遇上同類事件會如何處理？她說：「我唔清楚合約嘅內容，唔可以批評任何人。只係想件事快啲平息，大家息事寧人。但係經過呢件事之後，帶到個訊息畀我，我會幫我嘅代言人買保險，保障番佢哋。其實喺阿梅拍緊《鍾無艷》時，我搵過佢拍豐胸廣告，但係佢話唔係咁適合，我唔知乜嘢原因，不過佢就想拍收身廣告，但係我覺得佢太瘦。」
問到張玉珊若代言人過身後是否等同合約完結？她答：「我唔知人哋份合約包括啲乜嘢，唔想發表意見。」問她有否遇過代言人未履行合約？張玉珊即笑說：「曾經試過啦！可以點呢？大家合作係緣份，希望開開心心。」她指自己簽約是通常會先付部份酬勞給代言人，工作完成後再付尾數。
「我好多謝神咁錫我」
事後張玉珊補充說：「代言人各自都有買健康保險，但我會幫佢哋加大保額，呢啲主要都係保障番代言人。」會否要求代言人驗身以保障公司？張玉珊說：「其實大家係講個信字，合作係緣份。」
而早前Tiffany被雜誌拍到與男友拍拖逛街後，不久即傳出遭公司雪藏，Tiffany昨日就此回應說：「我覺得好搞笑，公司一路都幫我安排咗工作，同埋我都冇拍拖。不過如果拍拖我都未必會公開，因為香港個規矩係咁，尤其係歌手。」
對於近日有傳Stareast唱片部將節省開支，只為E-kids出唱片，Tiffany說：「我冇聽過，知道高層開緊會，我都好關心，但唔擔心去向，只要自己有得着。」
朱茵則表示今年會着重音樂方面的發展，她說：「雖然知道咁樣係會賺少好多，但係希望自己定位清晰啲，我亦都好多謝神咁錫我。」
「Sorry比較脹啲」
此外，恬妞昨日穿上一襲黑色開胸短裙示人，只見她胸前的第一顆鈕並沒扣上，問她是否扣不上鈕時，恬妞即笑說：「Sorry呀！比較脹啲，本來條裙個設計係應該打開晒三粒鈕，但我着唔到，size比較細啲。」問恬妞可擔心裙子走光？她說：「條裙四方八面都好安全，黐晒嘢。」
採訪：陳梅香
攝影：陳偉權
