打家用機成日有種「二手Game迷」感覺，皆因日文遊戲睇唔明又聽唔明，打英文版又唔係句句完全理解；睇雞精攻略，碰運氣估估吓，集結埋呢類二手資訊，真係令打機樂趣大減！PS2最近有三隻超大作以全中文化登場，佢哋包括有驚慄恐怖冒險嘅《死魂曲》；單槍隻身探虎穴嘅《火線危機3》；同動作華麗百人斬嘅《女忍者》！三隻Game，三種風格，好Game感覺重新體驗！
記者：朱崇德
上年年尾推出嘅PS2重頭戲《死魂曲》、《火線危機3》同《女忍者》咁快已經中文化，實屬少見！需知一年裏頭，PS2作中文化的遊戲實在唔多，去年大概只得10來隻，估計04年都唔會多過呢個數！所以今次中文Game三連發，已經佔去全年30%之數！
《死魂曲》被譽為SCEI最恐怖驚憟嘅遊戲，故事講述一班外地人，誤闖入一個四周布滿「屍人」的神秘村莊；而玩家就要逐一扮演這班「人」，逃過屍人的圍捕，走出村外；一邊玩！可用「人」數一直減少，簡直係電影《殺出個黎明》嘅翻版！遊戲氣氛同配樂真係恐怖到嚇死人！不過正如睇《貞子》冇字幕一樣，行嚟行去唔知搵乜，知佢恐怖但又唔知驚乜！冇攻略下打咗半個鐘，第一幕序章都過唔到就谷鬼氣熄機離場！
今次全中文化後感覺完全唔同，首先是每章「過關條件」及遊戲中的「重要提示」，全部變成中文字幕；最驚喜是首度加入普通話配音，事關過關條件好多時都靠聽取NPC（非玩家控制角色）的情報，特別加入嘅普通話對白，其實都幾簡單易明，如「過來！」、「聽我指示！」等，簡單得嚟亦令人明白過關玩法，唔使盲摸摸GameOver咁冇癮。
《火線危機》至經典當然係嗰種「限時限秒」、「躲躲射射」，殺敵過版嘅超爽快感啦！最新嘅《火線危機3》重以全中文化殺抵Game場！呢類流程咁急速嘅槍擊Game，是否有中文化的必要？其實親身打過，會發覺故事交代變得更圓滿；如點解第一集大佬MadDog會變成兩個人出現？中文版將會為你解除疑問！
至於中文化更實際的好處，首數原創嘅「劇情模式」，玩家需要在「街機模式」打爆機後才會出現！最過癮處除咗可以使用《TC》系統史上第一名女角之餘，打法亦會變成有限制條件下進行！例如「4秒內一槍殺敵」，以往日文版大家要估估吓，今次中文版就交代得清楚好多喇！
《女忍者》是名作《Shinobi～忍》的續篇，今次新一代《女忍者》就徹底好多喇！無論是在實際遊戲內容或者是說明書，都係完全確切嘅中文化版本，玩家可更愉快且輕易地融入遊戲世界。
《女忍者》稱得上係一隻不折不扣的動作遊戲，超華麗的遊戲畫面、流暢的動作加上超帥氣的殺陣、兩段衝刺與飛簷走壁等等，玩家可以完全體驗殺陣的爽快感覺，加上今集放寬了連技的接招限制，不論刀斬殺、手裏劍、踢擊或是忍術的串聯，只要達成連擊條件，都可能會發動殺陣，想一試怒濤般嘅百人殺陣也不再是夢想了！
(C)19951997200120022003NAMCOLTD.,ALLRIGHTSRESERVED
(C)SEGAWOW/SEGA,2003