何志平局長去年（羊年）到車公廟，依習俗求籤，得下籤，真係靈到你唔信，香港衰足大半年。今年猴年，何局長唔敢再去車公廟，改由鄉議局主席劉皇發紳士求籤。劉鄉紳沐浴更衣之後，誠心求籤，得第七十六（中籤），籤曰：「人情反覆似波濤，勿謂金蘭結義高，上古守明金重利，囊空不見舊同袍。」
點樣解讀呢？報紙訪問好幾位專家，居然唔少人話係好嘢，話香港噩運盡去，好景隨來，只係政府高層人事不和謂啫。呢啲說話，不可盡信，好多人對住個咪，就一定講好嘢，並不誠實。
計左丁山睇，呢支中籤實在係下籤，劉紳士特別要小心祈福㖭，為香港求籤，代表香港運程，香港一區之首，董特首更要小心。先講一個故事。馬主H年年新春都去車公廟求籤問事業，九五至○三年都得到上籤，只有九七例外得下籤，事後孔明，馬主H喺九五、九六、九八至○三年都叫做行運，事業唔錯。九七年呢，得三十三下籤：「聞道今宵是上元，銀燈火樹耀長天，無端一陣狂風雨，萬家燈熄斷管絃。」當時唔知點解，只知道有不祥之兆。結果當然就係金融風暴打到嚟，香港萬家燈火皆熄滅。再對上一次九四年，馬主H求得七十六中籤（即劉紳士之籤），當年馬主H問事業，收購一盤生意，剛剛接手，求得七十六籤，為之打個突。到咗年尾，生意執笠，馬主H損失不菲，遣散所有夥計同事，真係應驗咗「囊空不見舊同袍！」