上月病逝的梅艷芳生前簽下一紙美容廣告合約,近日竟爆發連串爭拗。劉培基前晚表示好友阿梅的廣告工作是逐次收款,間接否認美容中心老闆娘Joyce簽約即支付阿梅七成酬金的說法,劉培基又暗寸Joyce是個講一套做一套的人。
梅艷芳生前與現代美容中心簽下兩年廣告合約,但她只履行了三個月便病逝。近日美容院老闆娘Joyce與阿梅生前經理人王敏慧開會為合約問題的爭拗,Joyce力斥有人刻意隱瞞阿梅身患末期癌症,並要求Marianne交代事件。阿梅生前的好友劉培基前晚在泰國接受訪問時,表示清楚合約內容之餘,亦力撐Marianne。
近年已移居泰國的劉培基前晚接受訪問談到Joyce和Marianne的爭拗時,他說:「我日前返香港嗰陣Marianne都有問番我意見,我同佢講件事會不了了之,唔使擔心。」
阿梅收幾多錢我都知
劉培基表示完全清楚阿梅的合約內容,他說:「阿梅收幾多錢我都知,佢應該唔止呢個數,阿梅只會做多,唔會做少,係做一次畀一次錢。」
據知阿梅所簽的兩年合約要拍四條廣告片,劉培基說:「阿梅拍咗兩條,如果我係Marianne,一定要佢即刻畀錢㖭。」Joyce曾否到訪阿梅家?劉培基說:「我親眼喺阿梅屋企見過Joyce上嚟開會,我當時喺飯廳冇坐埋去,所以唔知佢哋講乜,不過冇幾耐阿梅就向外公布患癌消息。」
我手上有付款簽收證明
劉培基又替Marianne為與Joyce開會等候一小時不值,他激動地說:「我知Marianne之後有appointment,但都等佢一個鐘。我劉培基行走江湖咁耐,講嘅係信用同守時,唔會講一套做一套。」問到劉培基可認為Joyce一邊登廣告支持阿梅,另一邊又追討賠償,是否講一套做一套時,他說:「咁咪係囉,我都唔相信佢會咁做。」
對於劉培基的言論,記者昨日致電Joyce求證時,她透過助手James說:「Joyce噚日(即前晚)已澄清咗,近排發生咁多嘢,我哋都交咗畀律師處理,暫時唔方便發表任何意見。」而對於劉培基指阿梅為美容院拍廣告是逐次收費,James說:「我哋手頭上就有付款同簽收證明,證明佢(梅艷芳)係收咗錢,就算將來訴諸法律,我哋都有證據證明邊方面真同假。」
至於劉培基力撐Marianne當日曾為開會呆等一小時,James說:「劉生當時唔喺現場,佢嘅資料都係聽人講。」問到Joyce將事件交由律師處理是否有意索償?James說:「我哋淨係想知嗰份合同中,我哋有乜嘢權利,攞啲法律意見先再決定會唔會有進一步行動。」
保留追究被侵犯私隱權利
提到Marianne不滿神秘光碟曝光,有意循法律追究一事,James說:「我哋冇發放過光碟,都想追究邊個放出嚟,其實我哋同Marianne都有咁嘅權利,我哋都保留追究被侵犯私隱權利。」
另一方面,梅媽昨晚在兒子梅啟明和菲傭陪同下,前往黃大仙晚膳。問到梅媽可有留意連日來Joyce與Marianne的爭拗?她說:「有睇。」Marianne近日可有聯絡她?梅媽不屑說:「哈,佢會打畀我?」再問梅媽可知阿梅簽約時是否已收七成酬金時,她說:「唔好講呢啲嘢,我下星期一有嘢講。」提到誰是阿梅遺產承繼人時,梅媽理所當然地說:「我囉!」
此外,查小欣昨日在中環出席活動時說:「據我所知阿梅同Joyce講過佢有cancer。」是否言明是末期癌病?她說:「係咪末期只有醫生先知。」
採訪、攝影:何永寧(泰國)、比華利、梁錦雯