中聯系統（757）受到超人祝福，注入電訊資產。噚日復牌後，股價雖然勁升，但高開低收，小初慶幸冇追入，如果唔係就要坐艇，最大件事就係收市後，和黃（013）即刻配售中聯系統，復牌之後唔知會係乜光景。
中聯噚日一開市，就抽高至全日高位1.79元，但收市回吐至1.52元，雖然仍勁升37%，但就係全日最低位，高位追貨要損手。
經紀黃話，雖然中聯表現令捧場客失望，但芬佬界一早已話今年要轉買電訊科技股，好似上市剛滿半年的京信通信（2342），近期股價一直扶搖直上，完全當呢兩日跌市無料到，主要係芬佬憧憬大陸電訊業會好掂。
京信噚日再升5.1%，收4.625元，創上市以來新高，但成交只得193萬股，金額875萬元。
經紀黃話，京信主要業務喺大陸提供無線覆蓋解決方案，截至舊年6月，盈利有8676萬元，升32%。公司上市時預測，全年盈利有1.95億元，增長20%，斷估唔難達到，家陣芬佬鐘意電訊股，股價可能高處未算高。
慕容小初