下星期二喺灣仔會議展覽中心開騷嘅美國Nu-Metal班霸Korn，喺家鄉非常出名，佢哋唔止唱過《盜墓者羅拉：生命之匙》嘅主題曲，連卡通《衰仔樂園》都搵佢哋「客串」，齊齊捉鬼！
Korn今次親自為卡通配音，雖然平日佢哋嘅歌曲充滿死亡同憤恨意識，但其實五位成員平時都好搞笑，佢哋一爆發KornPower，就即時變成英文同音嘅Corn（粟米同爆穀）！佢哋又幫四個衰仔主角捉鬼，最後開騷時發揮震撼嘅音樂本色，嚇到SouthPark啲人目瞪口呆。
樂隊主唱Jonathan早前接受越洋電話訪問時話：「雖然自己經常同樂隊穿州過省開騷，但我盡可能喺周末留喺屋企同個仔睇DVD。亞洲地區我哋都去過，但除咗日本同新加坡之外，始終未嚟過香港，所以點都要嚟見識吓，𠵱家心情好緊張。」
雖然Jonathan話自己從來冇聽過香港音樂，但當晚Korn有機會同本地音樂人較量，因為Beyond成員黃貫中同佢監製嘅樂隊KingLyChee已經獲邀請做開場表演嘉賓。