劉嘉玲最近接受時裝雜誌訪問時，談及與男友梁朝偉的相處之道，並慨歎世事無常，應該珍惜眼前。嘉玲摸透男友的性格，二人均喜歡收藏自己，甚至躲起來不見人，換句話說，二人相處豈不是像玩捉迷藏？
劉嘉玲早前穿上多款春裝為時裝雜誌《Bazaar》拍照和接受訪問，大談跟男友梁朝偉如何相處，原來二人性格都有共通之處，在某程度上都喜歡「收埋」自己。
面對性格內斂、沉默寡言的梁朝偉，二人怎樣相處？嘉玲說：「佢都有開心一面，而我亦有收收埋埋嘅一面，只係大家表達嘅時間唔同啫。我獨處嘅時候會好收埋自己，面對朋友時就會畀人覺得開心；但係偉仔想收埋自己就收埋，喺陌生場合重難放鬆。」
那麼嘉玲平時會怎樣收埋自己？她說：「我會收埋自己喺某個地方，可能係泰國某個沙灘，睇吓書，瞓吓覺，曬吓太陽，感受一吓大自然，會諗吓嘢又或者乜嘢都唔去想，基本上都冇人會見過我收收埋埋自己個樣。我會整理好自己嘅情緒先出去見人，唔開心嘅話，寧願留番喺屋企。」
去年娛樂圈發生了很多不愉快事件，嘉玲希望今年會事事如意，她說：「每個年代、甚至每天都有生老病死，但去年發生太多事，唔係一時之間可以接受，我始終覺得大家要珍惜眼前，而且生命又真係好脆弱。」
此外，問嘉玲還會考慮在樂壇發展？她說：「肯定唔會。我當年唱片成績唔差，即係唔夠好啦。有啲嘢嘗試過就知道唔可以勉強，我知道自己唔適合做歌星。我覺得唱歌講天份，好似王菲同阿梅（梅艷芳）先係天生屬於舞台嘅。我對唱歌冇期望，當年我只係好奇，因為自己從來冇出過唱片，只係為咗一償心願啫。喺卡拉OK唱歌，我嘅拍子好準，但講到底，做歌星係要好專業嘅。」