中國國務委員唐家璇，傍實老胡訪問巴黎，同大隻江監察阿胡嘅言行，點知俾香港記者打橫問一句政制問題大陸版，唐唐話：政制發展，要照基本法「循序漸進」、「一步一腳印」咁行。
乜嘢叫「循序漸進」？一九九七年收回香港主權，一九九九年立法會選舉，二○○三年7.1自遊行，十一月區議會選舉，港人如來神掌怒碎民建聯，經過十年，香港一早就循序漸進，淨係得唐家璇幕後老闆江澤民所欽點嘅董建華一人，循序漸退！
煲呔曾噚日接見一批精英，港大法律系嘅副主任戴耀廷話畀煲呔知：二○○七年普選特首，完全符合基本法。呢一句，就係真正知書識禮嘅高質素法治教育家嘅理性觀點，唔係大陸護法蕭蔚雲之流嘅無知之言。
煲呔曾日前駁斥蕭蔚雲：立法會對高官提不信任票，並冇違反基本法。范徐麗泰都係咁講。可見蕭蔚雲呢類「法律專家」，係乜嘢水準（其實，大陸靠人治，冇法治，何來有乜嘢法律專家，真係大言不慚）。煲呔曾敢迎頭痛擊蕭蔚雲，又睇死老蕭唔代表大陸官方立場，企得硬淨過龜縮潛水嘅廢董好多，佢同范太兩個，喺市民心目中齊齊加分。
唐家璇話，政制發展要「一步一腳印」，但全世界受禽流感威脅，香港人就一步一驚心。英國權威科學雜誌指出：禽流感源自華南，中國政府隱瞞疫情，又試搞到咁大鑊。
上次沙士，三百條人命，人蠢冇藥醫，廢董同儍強，完全冇吸取教訓，一樣係一碌木咁企喺處，完全唔做嘢！
乜嘢疾病檢疫中心、甚麼中央屠宰、乜嘢居安思危，喺呢兩個大話精眼中，全部係一陣隨風而逝嘅口水泡。
廢董重喺度望天打卦，諗住禽流感過門不入，儍強重風趣，佢話信任「粵港通報機制」──上次沙士，廣東衞生廳有齊資料，陳馮富珍作證：廣東講到明就唔彈畀你，儍強好似一個十六歲嘅玉女，俾人呃過一次，賣過一次落廟街，但重係癡心一片。呢啲叫做「愛國」？或者喇。不過，喺一個正常人眼中，儍強一片癡情，執迷不悟，叫做犯賤。
香港發生危機，靠廢董儍強呢條特區災難單Q睇門口，點止三百人枉死，六百萬條人命條條凍過冰水。（兩個係災難單Q，自然廢董就係膽，儍強不過係腳，隻膽不變，隻腳就時時換，視乎邊一類災難，儍強又得、阿松又得、馬屎坑又得）。不過，老胡啱啱喺巴黎鐵塔頂同法國總統希拉克食完餐，抹完嘴，又去咗非洲，佢就梗係唔驚。希拉克招呼佢食嗰餐，就算係燒春雞，都唔會係madeinChina，暫時未有禽流感，不過，法國佬為歡迎老胡，竟然無喇喇向座巴黎鐵塔打正紅燈，將鐵塔赤化。咁阿胡走咗，法國佬會唔會受一鑊禽流感血光之災呢？咁就勞煩劉皇發補求支籤，問吓車公嘞。
傳真︰2623-9278
電郵︰