前日收費台同三色台都有波播，分別係米杜士堡對阿仙奴嘅英格蘭聯賽盃準決賽次回合，同埋荷蘭波海倫芬對阿積士；我求大俠諗住可以睇餐飽，點知兩場波都相繼因大風雪改期，搞到好多人眼光光。
講起兩間電視台嘅應變，似乎收費台好啲，起碼重有阿仙奴對米杜士堡嘅首回合賽事睇；至於三色台，喺海倫芬對阿積士場波改咗期後，主持人明顯方寸有啲亂，擾攘一輪後，始終都係冇球賽睇，而喺重播陳年電視劇集。
不過，有戰友提醒我，話米杜士堡場波喺前晚七點鐘鬆啲就已經知會改期，反而阿積士場波係臨場先決定冇得踢，所以難免收費台嘅準備會好啲。但我覺得做得直播賽事，應該喺事前預計所有可能性，所以點講都係三色台忙亂咗啲。
為踢非洲國家盃同紐卡素領隊卜比笠臣鬧翻嘅路亞，喺首仗頻失機，第二仗又領紅牌，累剛果民主共和國首圈出局；事後佢話要負全責，考慮退出國家隊。但我求大俠認為，小小挫折都受唔住，點做職業球員？佢當日為國家同球會撐到行，𠵱家又話唔踢國家隊，好兒戲啫！
上年呢個時候去巴塞救亡嘅教練安迪，證實將會接任今屆西甲好唔掂嘅切爾達到季尾，呢個救亡專家上屆教到巴塞可以踢番足協盃，點知巴塞打完齋唔要和尚，令到佢好似被人拋棄咁失落。我求大俠當然希望佢救到切爾達，而呢隊波又唔好學巴塞咁衰，繼續用佢，咁就皆大歡喜嘞！
繼早排賣走維沙斯後，佩魯賈日前竟然將中場主將兼隊長泰迪斯高賣去意乙熱拿亞，呢個舉動真係令人費解。話晒隊波家吓降班危機深重，唔通佢哋唔想保住個甲組席位？呢隊波正值多事之秋，新加盟嘅拉雲拿利練波受傷，禮拜對帕爾馬未必使預佢，都咪話唔黑仔。
前晚聯賽盃四強因天氣改期，米堡中堅伊奧古同修夫基都異口同聲話好失望，認為球隊個勢好，打唔成錯失良機。不過，我求大俠覺得改下周中對米堡重有利，阿仙奴三日打兩場，聯賽盃唔會畀太多主力出場，而米堡原本踢超聯補賽，有晒心理準備比賽，改期對米堡係利多於弊喎！