香港潮州商會噚日舉行新春團拜，成班「架己冷」同鄉聚首，包括林百欣、廖烈文、陳有慶，以及名譽會長國學大師饒宗頤教授，佢老人家久未露面，原來病咗四個月。
聽同佢老人家到場嘅女兒講，大師去年腦血管閉塞，引致輕微中風，家陣左邊身行動有啲不便，出入亦要人扶住，缺席公開場合幾個月。
不過饒教授依然潛心學術，最近更獲科大同中大頒發名譽文學博士，饒教授話冇乜特別高興，「呢兩個係我人生中第六、七個（博士）喇，今年最開心係出咗本書，要多謝潮州同鄉支持同幫手，好似廖烈智。」
李嘉誠舅仔莊學山都有出席，重好雀躍咁攞住部新買嘅3G電話四圍騷畀同鄉睇，幫姐夫賣廣告，「啱啱買，四千幾蚊好抵，我同李生買嘅。」
（圖左）86歲嘅饒宗頤教授原來舊年曾經輕微中風，𠵱家出入都要有人傍住。
傳真︰2623-9278
電郵︰