淡友噚日繼續借禽流感及美國可能加息出擊，恒指一度跌破13200，最多跌過262點，收報13334，跌幅收窄至97點，成交達218億元。
中聯系統（757）獲和黃（013）睇起，注入和記環球電訊固網資產，股價一度升逾60%，收報1.52元，升37%，成交高達2.59億元。不過，呢單deal被指作價過高，對中聯不利。
呢單deal和黃並冇收取現金，若和黃想套現，只有減持中聯股份，市場一般看法，估計和黃要將中聯搞到好好睇睇才可以高價減持，故此中聯仍有上升空間，點知收市後，和黃馬上配售中聯股份，點解咁要心急？另方面，和黃如此急於將固網業務借殼上市，可能反映對固網業務後市唔睇好。
噚日又傳出中移動（941）配股，但中移動已再度否認，至於會否有其他策略性股東減持，暫時就不得而知。現時光大控股（165）仍持有4500萬股中移動，市場一早預咗佢會沽貨套現。以中移動昨日收市價26.20元計，市值只得11.79億元，近日大市雖偏軟，但成交未縮，要接呢手貨綽綽有餘，消息不足以影響大市。不過股東減持之聲此起彼落，反映大市有見頂之兆。
華人置業（127）噚日又見異動，有一手4000萬股上板，每股作價4.65元，涉資1.86億元，其後股價急升6.4%至5元。黑客話，呢手貨傳聞係大股東趁高減持畀炒家，至於傳聞係堅定流，相信稍後有分曉。
蜂林（8156）噚日傳出有芬佬增持至逾5%，隨即有人大叫快跟入，股價逆市升5.7%至1.10元。
阿 虎