連串刺激經濟措施推出後，樓市即刻生番晒，價錢重乘機向上調升番㖭，唔少住宅業主更加封盤反價，估唔到連寫字樓市場，都有業主唔肯賣嘅情況出現。
聽講呢個係中環皇后大道中九號單位，面積六千幾方呎。舊年七月，以每呎四千二賣出。到十月，完成交易後，再以四千六轉手。
新買家隨即收到投資者出價，每呎六千一。有三成三厚利，理應諗都唔使諗，飛身獲利回吐。
點知佢覺得個市重有得升，而且市場盤少，呢類優質貨，應該唔憂賣，所以斷然拒絕。
短短個零月，價錢升三分一，個業主都可以抵受得住誘惑唔賣，認真有定力。市場人士聽到都有啲嘩然。
不過，喺農曆新年前竟以每呎六千九沽出。足足抽高一半，可見呢個投資者認真好眼光。
業內人士話，𠵱家寫字樓造價只係收復沙士失地，加上租金重未開始反彈，所以價格暫時都冇話狂升，但遲啲就唔敢包，因為近期已經多咗炒家入市。
樓市交投暢旺，前線代理梗開心！
但係聽啲代理區頭講，遲啲重精采，點解？原來佢哋話，二月份會有好多新盤開賣，到時想放假都難。
除咗一手，二手都郁番，投資者紛紛大手掃貨，推動入市氣氛。
一手同二手都咁旺，代理收入重唔和味？過去幾年，代理捱咗咁耐，𠵱家終於等到好日子嘞，難怪近排見親啲代理，都心情靚靚。
美聯將軍澳南豐廣場分行郭玉滿，一個月內連升兩級，繼上月由區域經理升做高級區域經理之後，今個月又再升一級，成為助理營業董事，負責管理將軍澳區兩間分行，共五十人。
另外四間分行五十員工同西貢區，就由將軍澳營業董事李志成統領。
郭玉滿喺將軍澳區表現出色，旗下分行營業額，好多時都喺公司前列位置，攞獎攞到手軟。
點解長實高級營業經理黃思聰，同新地代理總經理周國賢，戴住嘉賓名牌，喺間便利店門口有講有笑？唔通係同間便利店做開幕嘉賓？
呢度係新盤林立嘅西九龍，香港置業星悅居分行開幕，噚日請嚟長實、新地、信置三大發展商售樓部負責人做嘉賓。
大家難得聚首一堂，一見面唔理三七二十一，就猛咁握手、傾偈。因為位置關係，結果變成好似祝賀隔籬間舖便利店咁樣！忘記身處位置，並唔係開張舖位，結果要在場人士提醒，先至移玉步去番開張嘅舖位度。
禽流感又再嚟，影響範圍重大好多，大家茶餘飯後，少不免講到呢個話題。
好似出席港置昇悅居分行開幕，長實高級營業經理黃思聰，被問到禽流感會唔會影響樓市，佢好搞笑咁話，買家𠵱家患咗樓市「猴擒感」喎！
佢解釋，近期樓市熾熱，好似啱啱過去嘅農曆新年假期，就有唔少買家唔去拜年去買樓，重有唔少投資者積極掃貨。
買家拿拿臨趕入市嘅熱情，對樓市有冇影響，睇怕都唔使多講。
黃思聰上司，長實執行董事趙國雄，下晝喺荃灣朗逸峯祝捷會上透露，佢哋唔用雞，改為用燒豬慶祝，據講都係想避一避。
蘭西
電郵地址：
